বিশ্বনাথত আৰক্ষী আৰু অৰ্ধ সামৰিক বাহিনীৰ ফুট মাৰ্চ

বিহালীঃ ৰাজ্যত দৈনিক বৃদ্ধি পোৱা ক’ভিড আক্ৰান্ত সংখ্যাই অভিলেখ সৃষ্টি কৰিছে৷ বিশেষকৈ সাতখন জিলাত এই প্ৰভাৱ বেছিকৈ পৰিছে আৰু বলৱৎ কৰা হৈছে কঠোৰ নীতি-নিৰ্দেশনা৷ ইয়াৰ পাছতো একাংশ অসচেতন লোকৰ বাবে আজি বিশ্বনাথ জিলাত প্ৰশাসনে কঠোৰ পদক্ষেপ লোৱা দেখা পোৱা গ'ল। আজিৰ পৰা সমগ্ৰ বিশ্বনাথত আৰক্ষী আৰু অৰ্ধ সামৰিক বাহিনীয়ে ফুট মাৰ্চ কৰিছে৷

এই সময়চোৱাত ঔষধ, দুগ্ধজাত সামগ্ৰীৰ বাহিৰে সকলো গেলামাল দোকান সম্পূৰ্ণৰূপে বন্ধ কৰি দিয়া হৈছে বিশ্বনাথ চাৰিআলি, গহপুৰ আৰু চতিয়াৰ নগৰ এলেকাত থকা৷ অৱশ্যে, প্ৰয়োজন সাপেক্ষে হোম ডেলিভাৰীৰ ব্যৱস্থাও কৰা হৈছে৷ ইয়াৰ লগতে বেংক সমূহ পুৱা ৯ বজাৰ পৰা ১২ বজালৈকে খোলা থাকিব। জিলা প্ৰশাসনে জাৰি কৰা এক জাননী যোগে এই নিৰ্দেশাৱলী অৱগত কৰিছে। পৰৱৰ্তী জাননী নিদিয়া পৰ্যন্ত এই নিৰ্দেশাৱলী বাহাল থাকিব বুলিও জিলা প্ৰশাসনে জনায়।