পূৱ বৰপেটাঃ বৰপেটা জিলাৰ নসত্ৰস্থিত কৃষ্ণগুৰু সেৱাশ্ৰমত সোমবাৰে পালন কৰা হয় আদিগুৰু দিৱস। প্ৰতি বছৰৰ ২৫ অক্টোবৰত পালন কৰা হয় এই আদিগুৰু দিৱস। পিতৃ-মাতৃ হৈছে আদিগুৰু। নসত্ৰস্থিত কৃষ্ণগুৰু সেৱাশ্ৰমৰ লগতে শাখা সেৱাশ্ৰমসমূহতো পালন কৰা হৈছে আদিগুৰু দিৱস। আদিগুৰু দিৱসত কৃষ্ণগুৰু সেৱাশ্ৰমৰ শিক্ষানুষ্ঠানসমূহৰ ছাত্ৰ-ছাত্ৰী, অভিভাৱকসকল উপস্থিত থাকে।
শৰণদাতা গুৰু কৃষ্ণগুৰু প্ৰভুক স্মৰণ কৰি অভিভাৱকসকলে নিজৰ সন্তানসকলক হিয়া উজাৰি আশীৰ্বাদ দিয়ে আৰু ছাত্ৰ-ছাত্ৰীসকলে আদিগুৰু পিতৃ-মাতৃৰ চৰণ স্পৰ্শ কৰি সেৱা জনাই শপত বাক্য গ্ৰহণ কৰে। গুৰুকৃষ্ণ প্ৰেমানন্দ প্ৰভু উপস্থিত থকা আদিগুৰু দিৱস পালন অনুষ্ঠানটোত শপত বাক্য পাঠ কৰোৱায় কৃষ্ণগুৰু সেৱাশ্ৰমৰ ভক্তিমাতৃ কুন্তলা পাটোৱাৰী গোস্বামীয়ে। অভিভাৱকসকলে নিজৰ সন্তানক একোটাকৈ ৰসগোল্লা খুওৱা দৃশ্য আছিল এক আবেগিক দৃশ্য। ক’ভিড প্ৰটকল মানি আদিগুৰু দিৱস পালন কৰা হয় বুলিও জানিবলৈ দিয়ে ভক্তি মাতৃ কুন্তলা পাটোৱাৰী গোস্বামীয়ে।
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।