নিউজ ডেস্কঃ আজিৰে পৰা আৰম্ভ হ’ব ইণ্ডিয়ান প্ৰীমিয়াৰ লীগ৷ পঞ্চদশ সংস্কৰণৰ আইপিএলত এইবাৰ দহটা দলে অংশগ্ৰহণ কৰিব৷ আজি উদ্বোধনী মেচখনত প্ৰতিদ্বন্দ্বিতা কৰিব যোৱাবাৰৰ বিজয়ী চেন্নাই ছুপাৰ কিংছ (চিএছকে) আৰু ৰাণাৰ্ছ-আপ কলকাতা নাইট ৰাইডাৰ্ছ (কেকেআৰ)এ৷ ২০১১ চনৰ পাছত এইবাৰ পুনৰ ১০ টা দলে বিশ্ব ক্ৰিকেটৰ আটাইতকৈ আকাংক্ষিত ‘টী-২০’ ট্ৰফীৰ বাবে যুঁজ দিব।
আইপিএল আৰম্ভ ‘লক্ষ্ণৌ চুপাৰজায়ান্টছ’ আৰু ‘গুজৰাট টাইটানছ’ নামৰ দুটা নতুন দলে প্ৰায় ১.৭ বিলিয়ন আমেৰিকান ডলাৰৰ সন্মিলিত মূল্য লাভ কৰি ব্ৰেণ্ড আইপিএলৰ পৰিসৰ পূৰ্বতকৈ বহুগুণে বৃদ্ধি হোৱাকে প্ৰতিফলিত কৰিছে৷ ভাৰতত ক’ভিডজনিত পৰিস্থিতি ক্ৰমশ: নিয়ন্ত্ৰণলৈ অহাৰ সময়ত বিচিচিআইৰ শীৰ্ষ বিষয়াসকলে স্বস্তিৰ উশাহ লৈছে৷ আৰু, দুবছৰৰ ব্যৱধানৰ পাছত এই ছিজনত ষ্টেডিয়ামত কমেও ২৫ শতাংশ ক্ষমতাৰ ভিৰৰ অনুমতিৰ সৈতে দেশৰ মাটিত আইপিএল সম্পূৰ্ণৰূপে অনুষ্ঠিত কৰিবলৈ সাজু হৈছে।
