চামগুৰিত ভয়ংকৰ পথ দুৰ্ঘটনা

চামগুৰিঃ নগাঁও জিলাৰ চামগুৰি আৰক্ষী থানাৰ অন্তৰ্গত পহুকটাত বৃহস্পতিবাৰে নিশা সংঘটিত হয় এক ভয়ংকৰ পথ দুৰ্ঘটনা। দুখন তেল ভৰ্তি টেংকাৰৰ মাজত হোৱা মুখামুখি সংঘৰ্ষৰ পিছতেই দুয়োখন তেল ভৰ্তি টেংকাৰ বাগৰি পৰিল ৰাজপথৰ দাঁতিত। দুৰ্ঘটনাটো সংঘটিত হোৱাৰ পাছতেই পলায়ন কৰে দুৰ্ঘটনাগ্ৰস্ত টেংকাৰ দুখনৰ চালক আৰু হেণ্ডিমেনৰ।

ইয়াৰ পাছতেই যেন চামগুৰিৰ ৰাজপথত উজান উঠিল তেলৰ। নিজৰ জীৱনকো তুচ্ছ কৰি অতি বিপদজনকভাৱে একাংশই এখন দুৰ্ঘটনাগ্ৰস্ত টেংকাৰৰ পৰা নিৰ্গত হৈ থকা তেল নিবলৈ হেতাওপৰা লগালে। তাৰ পাছতেই ততাতৈয়াকৈ চামগুৰি আৰক্ষী আৰু অগ্নি নিৰ্বাপক বাহিনী ঘটনাস্থলীত উপস্থিত হৈ প্ৰথম অৱস্থাত অঞ্চলটোত বিদ্যুৎ কৰ্তন কৰাৰ পাছতেই পৰিত্যক্ত টেংকাৰ দুখন উদ্ধাৰৰ চেষ্টা চলায়।