মাজুলীঃ উজনি মাজুলীৰ নতুন বজাৰ আৰক্ষী চকীৰ নাতি দূৰৈত অৱস্থিত ৰুবুল ষ্টৰত যোৱাৰাতি চোৰে লুট-পাট চলাই নগদ ৩০ হাজাৰ টকাসহ সোণৰ আ-অলংকাৰ, কাপোৰ, ইলেকট্রনিক সামগ্ৰী আৰু এটা লেপটপ লৈ উধাও হোৱা ঘটনাই চাঞ্চল্য বিৰাজ কৰিছে। ব্যৱসায়িক প্ৰতিষ্ঠানখনৰ স্বত্বাধিকাৰী ৰুবুল শইকীয়া কালি পত্নীৰ সৈতে যোৰহাটলৈ গৈ ঘূৰি আহি মৰিসূতিৰ পিতৃৰ গৃহত নিশা কটাই আজি নতুন বজাৰস্থিত দোকানলৈ আহে।
দোকান খুলিয়েই ৰুবুলে দোকানৰ সা-সামগ্ৰী বিশৃংখলা হৈ থকা দেখি আচৰিত হয়। লগে লগে তেওঁ দোকান গৃহৰ লগতে পৰিয়ালটো থকা ৰূম পৰীক্ষা কৰাত আচল তথ্য পোহৰলৈ আহে। চোৰে কোনো নথকাৰ সুযোগ বুজি ৰুবুলৰ দোকান গৃহটোৰ পিছফালৰ বেৰ এৰোৱাই ভিতৰত প্ৰৱেশ কৰি সকলো লুটপাট চলাই। ঘটনা সন্দৰ্ভত ৰুবুলে স্থানীয় নতুন বজাৰ আৰক্ষীক অৱগত কৰাত ঘটনাস্থলীত আৰক্ষী উপস্থিত হৈ অনুসন্ধান চলাইছে।
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।