বৰপেটাঃ নামনি অসমৰ বৰপেটা জিলাৰ অন্যতম উল্লেখযোগ্য ঠাই চেঙাত চেঙা ক্ৰীড়া সন্থাৰ সৌজন্যত আৰু মন্দিয়া আঞ্চলিক ক্ৰীড়া সন্থাৰ সহযোগত অহা ২০ অক্টোবৰ বৃহস্পতিবাৰৰ পৰা আয়োজন কৰা হৈছে অসম ভিত্তিক প্ৰাইজমানী নৈশ ফুটবল খেল প্ৰতিযোগিতা। ২০ অক্টোবৰৰ পৰা অনুষ্ঠিত হ'বলগা ফুটবল খেল প্ৰতিযোগিতাখনিৰ প্ৰস্তুতি প্ৰায় সম্পূৰ্ণ হৈ উঠিছে। মৰহুম মজিবৰ ৰহমান আৰু মৰহুম মহম্মদ আলীৰ সোঁৱৰণত স্থানীয় চেঙা বেচিক খেল পথাৰত অনুষ্ঠিত প্ৰতিযোগিতা খনিৰ প্ৰথম পুৰস্কাৰ হিচাপে ৫০ হাজাৰ এক টকাৰ লগতে ট্ৰফী এটা আৰু দ্বিতীয় পুৰস্কাৰ ৩০ হাজাৰ এক টকাৰ লগতে ট্ৰফী এটা ধাৰ্য কৰা হৈছে। লগতে প্ৰতিযোগিতাখনিৰ শ্ৰেষ্ঠ বিবেচিত খেলুৱৈ গৰাকীক ৭ হাজাৰ এক টকা আৰু ট্ৰফীৰে সন্মান জনোৱা হ'ব। উল্লেখযোগ্য যে মৰহুম মজিবৰ ৰহমানৰ সোৱৰণত প্ৰথম পুৰস্কাৰটি আগবঢ়াইছে ২৪ নং চেঙা মুছলমান পাৰা গাঁও পঞ্চায়তৰ সভাপতি মিৰ্জানুৰ ৰহমানে আৰু মৰহুম মহম্মদ আলীৰ সোঁৱৰণত দ্বিতীয় পুৰস্কাৰ আগবঢ়াইছে চেঙা মুছলমান পাৰা সমবায় সমিতিৰ সম্পাদক আব্দুল ওৱাহাবে। লগতে শ্ৰেষ্ঠ বিবেচিত খেলুৱৈ গৰাকীক বঁটা প্ৰদান কৰিব চেঙাস্থিত আগশাৰীৰ শিক্ষানুষ্ঠান জ্ঞান বিকাশ একাডেমিয়ে। ২০ অক্টোবৰত অনুষ্ঠিত হ'বলগীয়া প্ৰতিযোগিতাৰ উদ্বোধনী খেলখনত অংশগ্ৰহণ কৰিব নামনি অসমৰ অন্যতম শক্তিশালী ফুটবল ক্লাব কোকৰাঝাৰ ফুটবল ক্লাব আৰু বিপৰীতে যুজঁ দিব ব্যাসকুছি ভট্টদেৱ ক্ৰীড়া সন্থাই। উক্ত ফুটবল খেল প্ৰতিযোগিতা খনত সমূহ ক্ৰীড়াপ্ৰেমী ৰাইজৰ সহায়- সহযোগিতা শ্ৰদ্ধাৰে কামনা কৰিছে উদ্যোক্তা সকলে।
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।