টীয়কঃ টীয়কৰ বনাই উচ্চ মাধ্যমিক বিদ্যালয়ত অসমৰ অন্যতম জনপ্ৰিয় অভিনেতা নয়ন নিলীম উপস্থিত হৈ আজি বিদ্যালয়ৰ ছাত্ৰ-ছাত্ৰী তথা শিক্ষক কৰ্মচাৰীৰ লগতে স্থানীয় বহুসংখ্যক ব্যক্তিৰ সৈতে বাৰ্তালাপ কৰে। উল্লেখযোগ্য যে অহা ৪ নৱেম্বৰত মুক্তি লাভ কৰিবলগীয়া নতুন অসমীয়া বোলছবি বন্ধুৰ প্ৰচাৰৰ বাবে নয়ন নিলীমে তেওঁৰ বন্ধু বোলছবিৰ সহকৰ্মীসকলক লৈ এইদৰে অসমৰ বিভিন্ন প্ৰান্তৰ বিদ্যালয় মহাবিদ্যালয়ত উপস্থিত হৈ ছবিখন সকলোকে চাবলৈ আহ্বান জনাইছে। ইপিনে উক্ত বিদ্যালয়ৰ প্ৰাংগণত উপস্থিত হৈ বিশিষ্ট অভিনেতাজনে তেওঁৰ শৈশৱক ৰোমন্থন কৰি পঢ়া-শুনাৰ সমান্তৰালকৈ ইজনে সিজনক বন্ধুত্বৰ মাজেৰে সহায় সহযোগিতা আগবঢ়াই নিজ নিজ প্ৰতিভাসমূহ জগাই তুলিবলৈ আহ্বান জনায়। লগতে নৱ নিৰ্মিত অসমীয়া ছবিখন চাই বন্ধুত্বৰ সোৱাদ ল'বলৈ সকলোকে আহ্বান জনায়। উক্ত প্ৰচাৰ অনুষ্ঠানত সদৌ অসম ছাত্ৰ সন্থাৰ কেন্দ্ৰীয় সাংগঠনিক সম্পাদক জিতু নেওগ,যোৰহাট জিলা আছুৰ সাংস্কৃতিক সম্পাদক প্ৰিতম জ্যোতি শইকীয়া,শিমলুগুৰি আৰু টীয়ক আঞ্চলিক ছাত্ৰ সন্থাৰ সভপতি সম্পাদককে প্ৰমুখ্য কৰি ভালেসংখ্যক বিষয়ববীয়া উপস্থিত থাকি সহযোগিতা আগবঢ়ায়।
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।