ওৰাং: ওদালগুৰিৰ অসম অৰুণাচলৰ চামফুং বৰ্ডাৰ আউট পোষ্টৰ এছএছবিৰ ৬১ নং বেটেলিয়ান আৰু খালাকটাং আৰক্ষীয়ে এক যুটীয়া অভিযান চলাই খালাকটাঙৰ পৰা গাঞ্জাসহ এজন অসমৰ যুৱকক আটক কৰিবলৈ সক্ষম হয়। বৃহস্পতিবাৰে বিশেষ সুত্ৰৰ পৰা পোৱা তথ্যৰ ভিত্তিত এছএছবিৰ কামাণ্ডেণ্ট প্ৰমোদ কুমাৰ আগৰৱালৰ পৰ্যবেক্ষণত চলা অভিযানটোত এটা ঘৰৰ পৰা ১৪০ কেজি গাঞ্জাসহ অসমৰ যুৱকজনক আটক কৰে যুটীয়া অভিযানকাৰী দলটোৱে।
আটকাধীন অসমৰ যুৱকজন হ'ল ওদালগুৰি জিলাৰ ভৈৰৱকুণ্ডৰ সোণাৰী গাঁওৰ দেৱ কুমাৰ কাশ্যপ। আটকাধীন যুৱকজনে অৰুণাচলৰ খালাকটাঙত অস্থায়ীভাৱে ঘৰ সাজি দৈনিক হাজিৰা কাম কৰি আছিল বুলি জানিব পৰা গৈছে।
পিছত এছএছবিয়ে জব্দ কৰা গাঞ্জা সহ যুৱকজনক খালাকটাং আৰক্ষী চকীত চমজাই দিয়ে।
উল্লেখ্য যে যোৱা এপ্ৰিল মাহতো অৰুণাচলত গাঞ্জাসহ অসমৰ দুজন যুৱকক আটক কৰিছিল এছএছবিৰ ৬১ নং বেটেলিয়ানে।
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।