বাহাৰঘাটঃ জাতীয়তাবাদী শিবিৰৰ এজন আপোচবিহীন নেতাৰ মৃত্যুত শোকৰ ছাঁ। নলবাৰী জিলাৰ বিশিষ্ট সমাজকৰ্মী তথা অসম আন্দোলনৰ গুৰি ধৰোতা, সদৌ অসম ছাত্ৰ সন্থাৰ মাধ্যম আন্দোলনৰ নেতা, জাতীয়তাবাদী শিবিৰৰ অক্লান্ত যোদ্ধা, গন সংগ্ৰাম পৰিষদৰ সুদক্ষ নেতা, অসম গন পৰিষদৰ নলবাৰী জিলা সমিতিৰ বহু বছৰ ধৰি সভাপতিৰ আসন অলংকৃত কৰা সু-অভিনেতা, কৃতী খেলুৱৈ অকন মল্ল বৰুৱা আৰু নাই৷ ৭৫ বছৰ বয়সত কালি শেষ নিশ্বাস ত্যাগ কৰে৷ বহুদিন ধৰি জটিল ৰোগত আক্ৰান্ত হৈ নিজ বাসগৃহত কালি শেষ নিশ্বাস ত্যাগ কৰে৷
মৃত্যুৰ সময়ত পত্নী সহিতে দুগৰাকী পুত্ৰ সন্তানৰ লগতে দুগৰাকী কন্যা ইহ সংসাৰত এৰি থৈ যায়৷ সন্ধিয়া প্ৰায় ৮:৪৫ বজাত শেষ নিশ্বাস ত্যাগ কৰে অকন মল্ল বৰুৱাই৷ এসময়ত অসম আন্দোলনৰ গুৰি ধৰা নেতা গৰাকীৰ মৃত্যুত সমগ্ৰ নলবাৰী জিলাৰ লগতে জাতীয়তাবাদী শিৱিৰত গভীৰ শোকৰ ছাঁ পৰিছে। বৰুৱাৰ মৃত্যুত অগপৰ সভাপতি তথা মন্ত্ৰী অতুল বৰা, মন্ত্ৰী কেশৱ মহন্ত, ফনীভূষন চৌধুৰী, বিধায়ক অশোক শৰ্মা, সাংসদ দিলীপ শইকীয়া, অগপ নলবাৰী জিলা সমিতি, যুৱ পৰিষদ, মহিলা পৰিষদ, বিজেপি নলবাৰী জিলা সমিতি, নলবাৰী জিলা ছাত্ৰ সন্থা, অ জা যু পৰিষদ নলবাৰী জিলা সমিতি, অগপ যুৱনেতা দিলীপ কুমাৰ দাস, অগপ নেতা আক্ৰাম হুছেইন আদি কৰি বহুতো দল সংগঠনে গভীৰ শোক প্ৰকাশ কৰে৷
