পূৱ বৰপেটাঃ বৰপেটা জিলাৰ চেঙাত আজি নৱ প্ৰয়াস ফৰাম প্ৰডিউচাৰ কোম্পানী লিমিটেডৰ কাৰ্যালয় শুভ উদ্বোধন কৰা হয়। কাৰ্যালয়টো শুভ উদ্বোধন কৰে শ্যামল কুমাৰ দেয়ে। উদ্বোধনী অনুষ্ঠানত উপস্থিত থাকে বৰপেটা জিলাৰ ভাৰতীয় জনতা পাৰ্টিৰ সভাপতি অনিল চন্দ্ৰ দাস, কৃষক মৰ্চাৰ ৰাজ্যিক সম্পাদক মনোজ ডেকাকে ধৰি কেইবাজনো বিশিষ্ট লোক।
ইয়াৰ পাছতে গান্ধী জয়ন্তী উপলক্ষে নৱ প্ৰয়াস প্ৰডিউচাৰ কোম্পানী লিমিটেডৰ বাৰ্ষিক সাধাৰণ সভাখন অনুষ্ঠিত হয় চেঙা সমূহীয়া ভৱনত। নৱ প্ৰয়াস প্ৰডিউচাৰ কোম্পানী লিমিটেডৰ অধ্যক্ষ ৰাতুল পাঠকৰ সভাপতিত্বত অনুষ্ঠিত সভাখনৰ উদ্দেশ্যে ব্যাখ্যা কৰে ড০ ৰিংকু দাসে। সভাত বৰপেটা জিলা উপায়ুক্ত তেজ প্ৰসাদ ভূষালে উপস্থিত থাকি নৱ প্ৰয়াস প্ৰডিউচাৰ কোম্পানী লিমিটেডৰ উদ্দেশ্যৰ শলাগ লয় আৰু কৃষকসকলৰ সামূহিক কল্যাণৰ বাবে এই লিমিটেডক যথা সম্ভৱ সহযোগিতা আগবঢ়োৱাৰ আশ্বাস প্ৰদান কৰে।
অনুষ্ঠানটোৰ আন এগৰাকী অতিথি অসম ঔদ্যোগিক উন্নয়ন নিগমৰ উপাধ্যক্ষ জিতু তালুকদাৰে নিজৰ ভাষণত বৃহত্তৰ চেঙা অঞ্চলৰ কৃষকসকলক এই শুভ দিনৰ বাবে শুভেচ্ছা জ্ঞাপন কৰে আৰু গুজৰাটৰ দৰে চেঙাতো এই কোম্পানীটোৰ জৰিয়তে কৃষকসকলে অৰ্থনৈতিক বিপ্লৱৰ নতুন প্ৰয়াস কঢ়িয়াই আনিব পাৰিব বুলি আশা প্ৰকাশ কৰে। অনুষ্ঠানত কৃষি বিভাগ আৰু নাবাৰ্ডৰ কেইবাজনো বিশিষ্টলোকে অংশগ্ৰহণ কৰি গুৰুত্বপূৰ্ণ ব্যক্তব্য আগবঢ়ায়। উল্লেখ্য যে অনুষ্ঠানত চেঙা ৰাজহ চক্ৰৰ অন্তৰ্গত বহু কেইগৰাকী কৃষক উপস্থিত থাকে।
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।