পূৱ বৰপেটাঃ নলবাৰী জিলাৰ দৌলাশাল আৰক্ষীৰ জালত কুখ্যাত ড্ৰাগছ সৰবৰাহকাৰী আমানুৰ ৰহমান৷ কালি নিশা দৌলাশাল আৰক্ষীয়ে গোপন খবৰৰ ভিত্তিত অভিযান চলাই দৌলাশালৰ পৰা গ্ৰেপ্তাৰ কৰে কুখ্যাত ড্ৰাগছ সৰবৰাহকাৰীটোক৷ ধৃত ড্ৰাগছ সৰবৰাহকাৰী আমানুৰ ৰহমানৰ ঘৰ বৰপেটা জিলাৰ সৰ্থেবাৰী আৰক্ষী থানাৰ অন্তৰ্গত ক্ষুদ্ৰ বামুনবড়ীত৷
উল্লেখ্য যে ধৃত আমানুৰে দীৰ্ঘদিন ধৰি নলবাৰী আৰু বৰপেটা জিলাৰ সীমান্তবৰ্তী অঞ্চলসমূহত ড্ৰাগছৰ অবাধ ব্যৱসায় চলায় আহিছিল৷ আমানুৰ ৰহমানে ড্ৰাগছ সৰবৰাহত জড়িত থকাৰ কথা মুকালমুৱা আৰু দৌলাশাল আৰক্ষীয়ে জানিব পৰাত আমানুৰক বিচাৰি আৰক্ষীয়ে চলাইছিল অভিযান৷
কিন্তু আৰক্ষীয়ে বিচাৰি থকাৰ খবৰ পায়ে আমানুৰে বহিঃৰাজ্যকে ধৰি ডিব্ৰুগড়ত দীৰ্ঘদিন ধৰি পলায় থাকে৷ ধৃত আমানুৰে কালি ডিব্ৰুগড়ৰ পৰা আহি দৌলাশালত ঘূৰি ফুৰি থাকোতে আৰক্ষীয়ে গ্ৰেপ্তাৰ কৰে৷ ধৃত আমানুৰৰ বিৰুদ্ধে মুকালমুৱা আৰক্ষী থানাত ৰুজু হৈ থকা গোচৰৰ ভিত্তিত আজি নলবাৰী আদালতত হাজিৰ কৰোৱাত মহামান্য আদালতে কুখ্যাত ড্ৰাগছ সৰবৰাহকাৰীটোক জেল হাজোতলৈ প্ৰেৰণ কৰে৷
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।