হাজোত বেংক ডকাইতি: ডকাইতক উত্তম-মধ্যম ৰাইজৰ

গুৱাহাটী: তীৰ্থনগৰী হাজোৰ ব্যৱসায়িক প্ৰাণকেন্দ্ৰ পাখামেলাত দিন দুপৰতে চাঞ্চল্যকৰ ডকাইতি কাণ্ড সংঘটিত হৈছে। পাখামেলাস্থিত ভাৰতীয় ষ্টেট বেংকৰ গ্ৰাহক সেৱা কেন্দ্ৰত সংঘটিত হৈছে এই ডকাইতি কাণ্ডটো। পিষ্টল দেখুৱাই ডকাইতে লুটিলে গ্ৰাহক সেৱা কেন্দ্ৰটোৰ পৰা প্ৰায় দুই লক্ষাধিক টকা। ঘটনা সংঘটিত হোৱাৰ পাছতেই পাখামেলা চ´কত হুৱাদুৱা পৰিবেশৰ সৃষ্টি হয়। ঘটনাস্থলীত উপস্থিত একাংশ লোকে খেদি খেদি ডকাইত হাকিম আলীক কৰায়ত্ত কৰি উত্তম-মধ্যম দিয়ে।

মাৰ খাই লেবেজান হৈ পৰা ডকাইতটোক ৰাইজে হাজো আৰক্ষীক গতাই দিয়ে। ধৃত ডকাইতটোৰ পৰা এটি পুতলা পিষ্টল আৰক্ষীয়ে উদ্ধাৰ কৰে। ধৃত ডকাইত হাকিম আলীৰ ঘৰ হাজোৰ শনিয়াদীত বুলি আৰক্ষীয়ে জানিবলৈ দিছে। সমগ্ৰ ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে ।