মাৰ্ঘেৰিটাঃ আজি সদৌ তিনিচুকীয়া জিলা ছাত্ৰ সন্থাৰ আহ্বানত পুৱা ৫ বজাৰ পৰা ২৪ ঘণ্টীয়া তিনিচুকীয়া জিলা বন্ধৰ আহ্বান জনায়। মাৰ্ঘেৰিটাত আছুৰ এই বন্ধৰ প্ৰভাৱ সৰ্বাত্মক দেখা গৈছে। ডিব্ৰুগড় জিলা আৰক্ষী প্ৰশাসনে ছাত্ৰ সন্থাৰ কৰ্মীক বৰ্বৰভৱে কৰা অত্যাচাৰ আৰু নিৰ্মম প্ৰহাৰ কৰাৰ প্ৰতিবাদত ২৪ ঘণ্টীয়া বন্ধ আহ্বান কৰিছিল আছুৱে।
আজি পুৱাই মাৰ্ঘেৰিটা আঞ্চলিক ছাত্ৰ সন্থাৰ সদস্যসকলে ৰাজপথত ওলাই আহি টাইয়াৰ জ্বলাই মাৰ্ঘেৰিটাত বন্ধ সফল কৰিবলৈ চেষ্টা কৰে। প্ৰতিবাদস্থলীত আৰক্ষীৰ লোক উপস্থিত হৈ টাইয়াৰ জ্বলোৱা কাৰ্য্যক বাধা দিয়া দেখা যায়।
উল্লেখ্য যে ডিব্ৰুগড়ৰ ডিব্ৰু মহাবিদ্যালয়ত ছাত্ৰ একতা সভাৰ নিৰ্বাচনক কেন্দ্ৰ কৰি সূত্ৰপাত হোৱা সংঘাতৰ ফলত ছাত্ৰ সন্থাৰ প্ৰায় ১৫ জন সদস্যক ডিব্ৰুগড় আৰক্ষীয়ে আটক কৰি ৰখাৰ প্ৰতিবাদত এই বন্ধ কাৰ্যসূচী ৰূপায়ণ কৰে আছুৱে। বিনা চৰ্তত ছাত্ৰ সন্থাৰ সদস্য সকলক মুকলি কৰি দিয়াৰ দাবী জনায় নহ'লে এই আন্দোলন আৰু তীব্ৰতৰ কৰি তুলিব বুলি জানিবলৈ দিয়ে আন্দোলনকাৰীয়ে।
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।