জামুগুৰিহাটঃ বড়োলেণ্ড টাইকোৱাণ্ডো এচচিয়েচনৰ অধিনত ওদালগুৰি জিলাৰ ডিমাকুছিত ২৭,২৮ আৰু ২৯ডিচেম্বৰত তিনিদিনিয়া কাৰ্য্যসুচীৰে অনুষ্ঠিত হয় সদৌ অসম ভিত্তিত টাইকোৱাণ্ডো প্ৰতিযোগিতা৷ ৰাজ্যৰ বিভিন্ন প্ৰান্তৰ প্ৰায় তিনি শতাধিক প্ৰতিযোগীয়ে অংশগ্ৰহণ কৰা প্ৰতিযোগিতা খনিৰ চাব জুনিয়ৰ আৰু জুনিয়ৰ শাখাত শোণিতপুৰ জিলাৰ হৈ অংশগ্ৰহণ কৰি বাৰ্বী বৰুৱাই জামুগুৰিহাটলৈ গৌৰব কঢ়িয়াই আনিবলৈ সক্ষম হৈছে৷ ৩০ কেজি শাখাত বাৰ্বী বৰুৱাই কেইবা গৰাকী প্ৰতিযোগীক ধাৰাশায়ী কৰি সোণৰ পদক জিনিবলৈ সক্ষম হয়৷ ইতিপূৰ্বে কেইবাখনো খেলত অংশগ্ৰহণ কৰি বাৰ্বী বৰুৱাই সোণৰ পদক জিনিবলৈ সক্ষম হৈছিল৷ বাৰ্বী বৰুৱাৰ এই কৃতকাৰ্যতাত শুভেচ্ছা জনাই উজ্জ্বল ভৱিষ্যত কামনা কৰিছে অঞ্চলটোৰ বিভিন্ন দল-সংগঠনৰ লগতে ব্যক্তি বিশেষে৷ বাৰ্বী বৰুৱা জামুগুৰিহাটৰ বিশিষ্ট হোমিও চিকিৎসক ডা০ দাদুল বৰুৱা আৰু জুৰি বৰুৱাৰ কনিষ্ঠ কন্যা আৰু হলি চাইল্ড ইংলিচ স্কুলৰ চতুৰ্থ শ্ৰেণীৰ ছাত্ৰী৷
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।