ড্ৰাগছ আসক্ত যুৱকক নিচামুক্তি কেন্দ্ৰলৈ প্ৰেৰণ মাজদিয়া আৰক্ষীৰ

 01/06/2022 - 13:37
 
 
পূৱ বৰপেটাঃ বৰপেটা জিলাৰ মাজদিয়া আৰক্ষীৰ তৎপৰতাত নিচাসক্ত যুৱকক পঠোৱা হ'ল নিচামুক্তি কেন্দ্ৰলৈ। সৰ্থেবাৰীৰ মাজদিয়া-গৰেমাৰীৰ  মতিয়াৰ ৰহমানৰ পুত্ৰ জেহেৰুল ইছলামে দীৰ্ঘদিন ধৰি নিচাসক্ত হৈ ঘৰত চলাই আহিছিল তাণ্ডৱ।
 
নিচাসক্ত জেহেৰুলৰ তাণ্ডৱত অতিষ্ঠ হৈ পৰিছে মতিয়াৰ ৰহমানৰ পৰিয়াল। সততে ঘৰত তাণ্ডৱৰ সৃষ্টি কৰা জেহেৰুলক নিয়ন্ত্ৰণ কৰিব পৰা নাছিল পৰিয়ালে। আৰু অৱশেষত  অতিষ্ঠ হৈ পৰা পৰিয়ালে মাজদিয়া আৰক্ষী চকীত জেহেৰুলৰ বিৰুদ্ধে দাখিল কৰিলে গোচৰ।
 
এই গোচৰৰ ভিত্তিত মাজদিয়া আৰক্ষী চকীৰ ভাৰপ্ৰাপ্ত আৰক্ষী বিষয়া অনিৰ্বাণ ৰাহাঙে জেহেৰুলক আটক কৰি পৰিয়ালৰ সহযোগত কামৰূপ জিলাৰ চাংসাৰিৰ অনেষ্টি ফাউণ্ডেচনৰ তত্বাৱধানত চলি থকা নিচামুক্তি কেন্দ্ৰলৈ প্ৰেৰণ কৰে।
 
নৱ-প্ৰজন্মক নিচাজাতীয় দ্ৰব্য আৰু কু-সংগৰ পৰা আঁতৰি থাকিবলৈ অনুৰোধ জনাইছে আৰক্ষী বিষয়া অনিৰ্বাণ ৰাহাঙে। আৰক্ষী বিষয়াগৰাকীৰ এনে পদক্ষেপক আদৰণি জনায় স্থানীয় ৰাইজে।
PratibimbaLive's picture
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।