কাকপথাৰঃ অসম জাতীয়তাবাদী যুৱ ছাত্ৰ পৰিষদে কাকপথাৰ অঞ্চলৰ বিভিন্ন বিদ্যালয়ত এক ব্যতিক্ৰমী অনুষ্ঠান হাতত লৈছে৷ কাকপথাৰ অঞ্চলৰ বিদ্যালয়সমূহত ছাত্ৰ-ছাত্ৰীৰ পাঠ্যপুথিৰ জ্ঞানৰ লগতে সাধাৰণ জ্ঞান বৃদ্ধিৰ উদ্দেশ্যেৰে "প্ৰশ্ন মঞ্চ" শীৰ্ষক এক অনুষ্ঠান অনুষ্ঠিত কৰাৰ লগতে শেষত জিলাখনৰ ভিতৰত পৰীক্ষা অনুষ্ঠিত হ'ব বুলি জানিবলৈ দিয়ে৷
সংগঠনটোৱে ছাত্ৰ-ছাত্ৰী আৰু শিক্ষকসকলৰ মাজত এটা মধুৰ সম্পৰ্ক গঢ়ি তোলাৰো এক প্ৰয়াস বুলি জনাইছে৷ আজি কাকপথাৰ অঞ্চলৰ অগ্ৰণী শিক্ষানুষ্ঠান কৈলাশপুৰ উচ্চ মাধ্যমিক বিদ্যালয়ত উক্ত অনুষ্ঠান হৈ যায়৷ যুৱ ছাত্ৰ পৰিষদৰ তিনিচুকীয়া জিলা সমিতিৰ উপ সভাপতি সোণমনি চলিহাৰ নেতৃত্বত হোৱা "প্ৰশ্ন মঞ্চ" অনুষ্ঠানটিৰ আঁত ধৰে শিক্ষক উৎপল দত্তই৷
সমাজ জীৱনৰ লগতে পাঠ্যপুথিৰ বিভিন্ন প্ৰশ্নৰ সুন্দৰকৈ উত্তৰ দি ছাত্ৰ-ছাত্ৰীসকলে বিদ্যালয়খনৰ শিক্ষাৰ মান প্ৰতিফলিত কৰে৷ যুৱ-ছাত্ৰ পৰিষদে ছাত্ৰ-ছাত্ৰীসকলৰ বাবে অনুষ্ঠিত কৰা এনেধৰণৰ কাৰ্যসূচী সঁচাই প্ৰশংসনীয় আৰু শলাগ ল’বলগীয়া সচেতন ৰাইজে মত প্ৰকাশ কৰিছে৷
