পূৱ বৰপেটাঃ বৰপেটা জিলাৰ পূব প্ৰান্তৰ উচ্চ শিক্ষাৰ প্ৰতিষ্ঠান চেঙাস্থিত মধ্য কামৰূপ মহাবিদ্যালয়ৰ মহাবিদ্যালয় সপ্তাহ উপলক্ষে বৃহস্পতিবাৰে অনুষ্ঠিত হয় বঁটা বিতৰণি আৰু মুকলি সভা। মহাবিদ্যালয়খনৰ অধ্যক্ষ ডঃ গোপেশ কুমাৰ শৰ্মাৰ সভাপতিত্বত অনুষ্ঠিত মুকলি সভাখনত মুখ্য অতিথি হিচাপে উপস্থিত থাকি ছাত্ৰ-ছাত্ৰীসকল উপকৃত হোৱাকৈ ভাষণ প্ৰদান কৰে নসত্ৰস্থিত কৃষ্ণগুৰু আধ্যাত্মিক বিশ্ববিদ্যালয়ৰ উপাচাৰ্য ডঃ তৰুণ চন্দ্ৰ বৰাই। নিৰ্দিষ্ট বক্তা হিচাপে উপস্থিত থাকে সৰুপেটাৰ ভৱানীপুৰ-হস্তিনাপুৰ মহাবিদ্যালয়ৰ অধ্যক্ষ বিৰিঞ্চি কুমাৰ দাসে।
সাংস্কৃতিক অনুষ্ঠান উদ্বোধন কৰে চেঙা সমষ্টিৰ বিধায়ক আশ্ৰাফুল হুছেইনে। মহাবিদ্যালয়খনৰ উপাধ্যক্ষ ডঃ হৰেন্দ্ৰ নাথ তালুকদাৰে আদৰণি ভাষণ প্ৰদান কৰা আদৰণি অনুষ্ঠানটোৰ আঁত ধৰে অধ্যাপিকা ডঃ মৃদুস্মিতা গোস্বামীয়ে। উদ্দেশ্য ব্যাখ্যা কৰে ছাত্ৰ একতা সভাৰ সাধাৰণ সম্পাদক আতিকুল ইছলাম খানে। আৰম্ভণিতে খোল-তাল বজাই মঞ্চলৈ আদৰি আনে বিশিষ্ট অতিথিসকলক।
মুকলি সভাৰ পূৰ্বেই ভেশচন প্ৰতিযোগিতা অনুষ্ঠিত হয়। উল্লেখ্য যে যোৱা ১০ ফেব্ৰুৱাৰীত অধ্যক্ষ ডঃ গোপেশ কুমাৰ শৰ্মাই মহাবিদ্যালয় সপ্তাহৰ পতাকা উত্তোলন কৰি মহাবিদ্যালয় সপ্তাহৰ শুভাৰম্ভ কৰে। মহাবিদ্যালয় সপ্তাহ উপলক্ষ্যে অনুষ্ঠিত বিভিন্ন প্ৰতিযোগিতাৰ স্থানপ্ৰাপ্তসকলক মুকলি সভাত পুৰস্কাৰসমূহ প্ৰদান কৰা হয়।
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।