গহপুৰ হেলেমৰ চিংলীজান বনাঞ্চলত বনৰীয়া হাতীৰ মৃতদেহ উদ্ধাৰ

গহপুৰঃ পূব শোণিতপুৰ বন সংমণ্ডলৰ বৰগাঙ ৰেঞ্জৰ অন্তৰ্গত চিংলীজান বনাঞ্চলৰ গহপুৰৰ হেলেম চাপৰিত এটা প্ৰকাণ্ড বনৰীয়া হাতীৰ মৃতদেহ উদ্ধাৰ। বনাঞ্চলটোৰ ঘন হাবিৰ মাজত অৰ্ধগলিত অৱস্থাত হাতীটো উদ্ধাৰ কৰিবলৈ সক্ষম হয় বন বিভাগৰ লোকে। কি কাৰণত হাতীটোৰ মৃত্যু হৈছে জানিব পৰা হোৱা নাই যদিও এমাহ মান পূৰ্বে মৃত্যু হোৱাৰ আশংকা প্ৰকাশ কৰিছে বন বিভাগৰ লোকে। পশু চিকিৎসকৰ দল আহি মৰণোত্তৰ পৰীক্ষা কৰিছে যদিও কি কাৰণত হাতীটোৰ মৃত্যু হৈছে মৰণোত্তৰ পৰীক্ষাৰ প্ৰতিবেদনৰ পাছতহে কব পৰা যাব বুলি মন্তব্য কৰে বৰগাঙ ৰেঞ্জৰ ৰেঞ্জাৰ চক্ৰপাণি ৰায়ে। ইতিমধ্যে বন বিভাগৰ অজ্ঞাতে মৃত হাতীটোৰ দুই দাঁত কোনো লোকে কাটি লৈ যায়। এই বিষয়ে বন বিভাগৰ এটি উচ্চপদস্থ বিষয়াৰ দলে আহি ঘটনাস্থলীত উপস্থিত হৈ নিজা ভৱীয়াকৈ এখন গোচৰ ৰুজু কৰি তদন্ত আৰম্ভ কৰিছে।