হাউলীঃ সদ্য ঘোষিত হাইস্কুল শিক্ষান্ত আৰু উচ্চতৰ মাধ্যমিক চূড়ান্ত শিক্ষান্ত পৰীক্ষাত অসমৰ ভিতৰত স্থানপ্ৰাপ্ত বৰপেটা জিলাৰ শিক্ষাৰ্থীসকলক অসম জাতীয়তাবাদী যুৱ পৰিষদৰ বৰপেটা জিলা সমিতিৰ উদ্যোগত এখন সম্বৰ্ধনা অনুষ্ঠান আজি জিলা যুৱ পৰিষদৰ সভাপতি ৰূপম নাথৰ পৌৰোহিত্যত হাউলী জুনিয়ৰ কলেজ প্ৰাঙ্গণত অনুষ্ঠিত হয়৷
সভাত অসমৰ ভিতৰত স্থানপ্ৰাপ্ত বৰপেটা জিলাৰ হাইস্কুল আৰু উচ্চতৰ মাধ্যমিক চূড়ান্ত পৰীক্ষাত স্থানপ্ৰাপ্ত শিক্ষাৰ্থীসকলক একোখনকৈ ফুলাম গামোচা, জাপি, কিতাপৰ টোপোলা, মানপত্ৰ, কলম আদিৰে আনুষ্ঠানিকভাৱে সম্বৰ্ধনা জনোৱাৰ লগতে উক্ত অনুষ্ঠানত ৬ নং বৰপেটা লোকসভা সমষ্টিৰ নৱ নিৰ্বাচিত সাংসদ আব্দুল খালেককো গামোচা, জাপি আৰু শৰাইৰে সংগঠনটোৱে সম্বৰ্ধনা জনায়৷
সভাত অসম জাতীয়তাবাদী যুৱ পৰিষদৰ কেন্দ্ৰীয় সাধাৰণ সম্পাদক উদয়ন কুমাৰ গগৈ, হাউলী জুনিয়ৰ কলেজৰ অধ্যক্ষ অনিল চন্দ্ৰ কলিতা, হাউলী বি, এইচ কলেজৰ অধ্যাপক চুলতান আলী আহমেদ, যুৱ পৰিষদৰ কেন্দ্ৰীয় উপদেষ্টা ৰাজেন তালুকদাৰ আৰু সাংবাদিক পেঞ্চনাৰ ৰত্নেশ্বৰ তালুকদাৰ আদিয়ে উপস্থিত থাকি ছাত্ৰ-ছাত্ৰীলৈ বিশেষ পৰামৰ্শমূলক বক্তব্য আগবঢ়ায়৷
