ৰঙাপৰা: শোণিতপুৰ জিলাৰ ৰঙাপৰাৰ হাতীবাৰী চাহ বাগিচাত অসম চাহ জনজাতি ছাত্ৰ সন্থা(আটছা)ৰ হাতীবাৰী প্ৰাথমিক গোটে হাইস্কুল শিক্ষান্ত আৰু উচ্চতৰ মাধ্যমিকত উত্তীৰ্ণ হোৱা চাহ জনগোষ্ঠীয় কৃতী ছাত্র ছাত্ৰীক অভিনন্দন অনুষ্ঠানৰ দ্বাৰা আজি সম্বৰ্ধনা জনায়। সদ্য ঘোষিত হাইস্কুল শিক্ষান্ত পৰীক্ষাৰ ৯ গৰাকী আৰু উচ্চতৰ মাধ্যমিকত ৬ গৰাকী সুখ্যাতিৰে উত্তীৰ্ণ হোৱা মুঠ ১৫ গৰাকী ছাত্ৰ-ছাত্ৰীক সম্বৰ্ধনা জনোৱা হয়। ইয়াৰে হাতীবাৰী ক্ৰেছ হাউছত আজি দিনৰ ১ টা বজাত অনুষ্ঠিত সভাত সভাপতিত্ব কৰে আটছাৰ হাতীবাৰী প্ৰাথমিক গোটৰ সভাপতি ৰাজু তাঁতিয়ে।
আটছাৰ হাতীবাৰী প্ৰাথমিক গোটৰ সম্পাদক এলবেষ্টাৰ খেৰিয়াই আঁত ধৰা সম্বৰ্ধনা অনুষ্ঠানটিত অংশগ্ৰহণ কৰে আটছাৰ উপ শাখাৰ সভাপতি চাকিৰাম তাঁতি, হাতীবাৰী প্ৰাথমিক বিদ্যালয়ৰ প্ৰধান শিক্ষক কৃষ্ণ গুৱালা, আটছাৰ শোণিতপুৰ জিলা সমিতিৰ সাংগঠনিক সম্পাদক মনোজ গুৱালা, আটছাৰ ৰঙাপৰা উপ শাখাৰ সহ সম্পাদক শিৱা কৰ্মকাৰ আৰু লগতে বহু গন্যমান্য ব্যক্তি। হাতীবাৰী চাহ বাগিচাৰ অঞ্চলৰ পৰা অহা ছাত্ৰ -ছাত্ৰীসকলে আজি ভালদৰে উত্তীৰ্ণ হোৱা এক উল্লেখনীয় পদক্ষেপ বুলি সভাত বক্তাসকলে নিজৰ ভাষণত উল্লেখ কৰে।
আটছাই হাতীবাৰী চাহ বাগিচাৰ কৃতী ছাত্র ছাত্ৰীসকলক গামোচা আৰু একোটাকৈ বেগ উপহাৰ স্বৰূপে আগবঢ়াই অভিনন্দন জনায়।
