কাকপথাৰঃ কাকপথাৰৰ এজন যুৱক কলিকতাত নিৰুদ্দেশ হোৱাৰ বাতৰি পোৱা গৈছে৷ যোৱা ৪ জুন তাৰিখে ৰুবুল মাহাতু(লাচু)(২২)নামৰ যুৱকজন হায়দৰাবাদলৈ কাম কৰিবলৈ ঘৰৰ পৰা ৰাউনা হৈছিল৷ ৰে’লযোগে যাত্ৰা কৰি থকা অৱস্থাত বৃহস্পতিবাৰে ৰেলতে ছয় জনীয়া এটা যুৱকৰ দলৰ লগত সংঘাত হোৱা বুলি পৰিয়ালৰ লোকক ফোন যোগে জানিবলৈ দিছিল যুৱকজনে৷ কলিকতাৰ হাওৰা ষ্টেচনলৈকে পৰিয়ালৰ সৈতে ফোনযোগে যোগাযোগ অব্যাহত থকা যুৱকজনৰ তাৰ পিছতে কোনো সংযোগ লাভ কৰিবলৈ সক্ষম হোৱা নাই ৷
ভদ্ৰ, নম্ৰ তথা অসম জাতীয়তাবাদী যুৱ-ছাত্ৰ পৰিষদৰ প্ৰাক্তন সদস্যজনৰ নিৰুদ্দেশৰ বাতৰিয়ে চাঞ্চল্যৰ সৃষ্টি কৰিছে কাকপথাৰত৷ ইতিমধ্যে কাকপথাৰ আৰক্ষী থানাত এজাহাৰ দাখিল কৰিছে পৰিয়ালৰ্বগই৷ উল্লেখ্য যে বহি:ৰাজ্যত বিশেষকৈ কলিকতাত বিগত কিছু সময়ৰ পৰা অসম তথা তিনিচুকীয়া জিলাৰ বহু যুৱক-যুৱতীৰ নিৰুদ্দেশ হোৱাৰ বাতৰি সংবাদ মাধ্যমত সঘনাই প্ৰকাশ পাবলৈ ধৰিছে৷ নিৰুদিষ্ট যুৱক জনক অতি শীঘ্ৰে সন্ধান ওলিয়াবলৈ পৰিয়ালবৰ্গই প্ৰশাসনৰ ওচৰত অনুৰোধ জনাইছে৷
