জামুগুৰিহাটঃ দেশৰ একক বৃহৎ সামাজিক সাংস্কৃতিক অনুষ্ঠান হিচাপে পৰিচিত ঐতিহ্যমণ্ডিত জামুগুৰিহাটৰ বাৰেচহৰীয়া ভাওনা মহোৎসৱ এইবেলি ২০২৩ বৰ্ষৰ মাৰ্চত অনুষ্ঠিত কৰাৰ সিদ্ধান্ত কৰা হৈছে৷ এই উদ্দেশ্যৰে জামুগুৰিহাটৰ বৰভগীয়া গাঁৱৰ নামঘৰ প্ৰাংগণত গাঁওবাসী ৰাইজৰ আতিথ্যত বৃহত্তৰ জামুগুৰিহাটৰ পাঁচ শতাধিক ৰাইজৰ উপস্থিতিত অনুষ্ঠিত হয় এক ৰাজহুৱা সভা৷ বাৰেচহৰীয়া ভাওনা সমিতিৰ স্থায়ী সভাপতি ভৱ গোস্বামীৰ সভাপতিত্বত অনুষ্ঠিত সভাখনিত এখনি শক্তিশালী উদযাপন সমিতি গঠন কৰা হয়৷ চতিয়া সমষ্টিৰ বিধায়ক পদ্ম হাজৰিকাক সভাপতি, ভৱ গোস্বামীক কাৰ্যকৰী সভাপতি আৰু জয়ন্ত বৰাক প্ৰধান সম্পাদক হিচাপে নিৰ্বাচিত কৰাৰ লগতে ২৫ খন উপ সমিতিও গঠন কৰা হয়৷
সভাত অংশগ্ৰহণ কৰি চতিয়া সমষ্টিৰ বিধায়ক তথা উদযাপন সমিতিৰ সভাপতি পদ্ম হাজৰিকাই কয়- বাৰেচহৰীয়া ভাওনা জামুগুৰিয়া ৰাইজৰ পৰিচয়৷ বাৰেচহৰীয়া ভাওনাই জামুগুৰিবাসীক বিপদে-আপদে সহায় কৰি আহিছে৷ মোকো বাৰেচহৰীয়া ভাওনাই সুৰক্ষা দি আহিছে৷ এই ভাওনাৰ মহত্ত্ব তথা আধ্যাত্মিকতাই জামুগুৰিহাটৰ প্ৰতিজন ব্যক্তিৰ হৃদয় পবিত্ৰ কৰি ৰাখিছে৷ এইবেলি ভাওনা মহোৎসৱত জামুগুৰিহাটৰ ২১খন বিভিন্ন ধৰ্মীয় সমাজে অংশ গ্ৰহণ কৰিব৷ ভাওঁনা মহোৎসৱলৈ ভাৰতৰ প্ৰধানমন্ত্ৰী নৰেন্দ্ৰ মোডীকো আমন্ত্ৰণ জনোৱাৰ চিন্তা চৰ্চা কৰা বুলিও মন্তব্য কৰে৷ ইয়াৰোপৰি ২৮ কোটি টকাৰে নিৰ্মান হৈ থকা বাৰেচহৰীয়া ভাওনাৰ সাংস্কৃতিক প্ৰকল্পটিও ভাওনাৰ সময়তে উদ্বোধন কৰিব বুলিও জানিবলৈ দিয়ে৷ এই ভাওনা মহোৎসৱলৈ দেশৰ বহুকেইগৰাকী সামাজিক, সাহিত্যিক, সাংস্কৃতিকক্ষেত্ৰৰ আগশাৰীৰ ব্যক্তিক আমন্ত্ৰণ জনোৱা হ’ব৷ এইবেলি ভাওনা মহোৎসৱত বড়ো, মিচিং, আদিবাসী জনগোষ্ঠীৰ উপৰিও ইছলাম ধৰ্মীয় লোকসকলেও সম্পূৰ্ণ সহযোগীতা আগবঢ়াব বুলি মন্তব্য কৰে সভাপতি ভৱ গোস্বামীয়ে৷
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।