লখিমপুৰ: লখিমপুৰ জিলাত বহু দিনৰ পৰা সন্ত্ৰাস চলাই অহা দুধৰ্ষ ডকাইত, শিশু সৰবৰাহকাৰী, অবৈধ অস্ত্ৰৰ গৰাকী ভোলা গগৈ (৩১) ওৰফে বাবু গগৈ ওৰফে নিগনিক আজি বগীনদী আৰক্ষীয়ে কৰায়ত্ত কৰিবলৈ সক্ষম হয়। ভোলা গগৈৰ বিৰুদ্ধে বগীনদী আৰক্ষী থানাত ৫ টাকৈ গোচৰ পঞ্জীয়ন হৈ আছিল। ভোলা গগৈ অন্যান্য বহুতো অপৰাধজনিত ঘটনাৰ লগতো জড়িত থকাৰ কথা প্ৰকাশ আৰক্ষীৰ৷ আজি লখিমপুৰ জিলাৰ বগীনদী আৰক্ষী থানাৰ ভাৰপ্ৰাপ্ত আৰক্ষী বিষয়া প্ৰিয়ব্ৰত গগৈৰ নেতৃত্বত অভিযান চলাই বগীনদী আৰক্ষী থানাৰ অন্তৰ্গত চৰাইমৰীয়াত থকা ভোলা গগৈৰ নিজ বাসগৃহৰ পৰা আটক কৰিবলৈ সক্ষম হয়।
ভোলা গগৈৰ পৰা ৫ টাকৈ ম'বাইল ফোনসহ চুৰি কাৰ্যত ব্যৱহাৰ কৰা অস্ত্ৰ আৰক্ষীয়ে উদ্ধাৰ কৰে। লগতে ভোলা গগৈৰ লগত চুৰি কাৰ্যত জড়িত থকাৰ সন্দেহত কুঞ্চন গগৈ (২৫) নামৰ আন এজনকো আটক কৰে আৰক্ষীয়ে। সম্পত্তি বগীনদী আৰক্ষীয়ে দুয়োকে জেৰা অবাহত ৰাখিছে।
