ৰঙিয়াঃ সম্প্ৰতি ৰাজ্যজুৰি চলি থকা হাইস্কুল শিক্ষান্ত কম্পাৰ্টমেন্টেল পৰীক্ষাৰ হিন্দী বিষয়ৰ পৰীক্ষা দিবলৈ আহি পৰীক্ষাৰ পৰা বঞ্চিত হ’ল পৰীক্ষাৰ্থীসকল। প্ৰাপ্ত তথ্যমতে উত্তৰ কামৰূপৰ কম্পাৰ্টমেন্টেল পৰীক্ষাৰ্থীসকলৰ একমাত্ৰ পৰীক্ষা কেন্দ্ৰ ৰঙিয়া মাদ্ৰাছা উচ্চতৰ মাধ্যমিক বিদ্যালয়ত আজি পুৱাৰ ভাগত হিন্দী বিষয়ৰ পৰীক্ষা দিবলৈ শিক্ষাৰ্থীসকল উপস্থিত হৈছিল৷ পিছে পৰীক্ষা কেন্দ্ৰত উপস্থিত হৈ পৰীক্ষাৰ্থীসকলে যোৱা ২ জুলাইতে হিন্দী বিষয়ৰ পৰীক্ষা সম্পন্ন হৈ যোৱা বুলি জানিব পাৰি মূৰত সৰগ ভাগি পৰে৷
পৰীক্ষা কেন্দ্ৰৰ তত্বাৱধায়ক তথা ৰঙিয়া মাদ্ৰাছা উচ্চতৰ মাধ্যমিক বিদ্যালয়ৰ অধ্যক্ষ ফজলুল হকে জনোৱা অনুসৰি ছেবাৰ পৰীক্ষাসূচী অনুসৰি হিন্দী বিষয়ৰ পৰীক্ষা যোৱা ২ জুলাইতে অনুষ্ঠিত হৈ যায়৷ গতিকে এইক্ষেত্ৰত তেওঁৰ কৰণীয় নাই৷ পৰীক্ষাৰ্থীসকলে অভিযোগ কৰা অনুসৰি ছেবাই কম্পাৰ্টমেন্টেল পৰীক্ষাৰ যি পৰীক্ষাসূচী প্ৰকাশ কৰিছিল সেই অনুসৰি যোৱা ২ জুলাইৰ আবেলি আৰু আজি ৬ জুলাইৰ পুৱা ইলেকটিভ বিষয়ৰ পৰীক্ষা আছিল৷ ছেবাৰ পৰীক্ষাসূচীত এই দুয়োটা দিনত কোনবোৰ বিষয়ৰ পৰীক্ষা অনুষ্ঠিত হ’ব সেয়া স্পষ্টকৈ জনোৱা নাছিল৷
উত্তৰ কামৰূপৰ অধিকাংশ বিদ্যালয়ৰ প্ৰধান শিক্ষকসকলে ছাত্ৰ-ছাত্ৰীসকলক জনাইছিল যে হিন্দী বিষয়ৰ পৰীক্ষা ৬ জুলাইৰ ৰাতিপুৱা আছে৷ সেই অনুসৰি ছাত্ৰ-ছাত্ৰীসকলে আজি পুৱা পৰীক্ষা দিবলৈ আহে যদিও বিফল মনোৰথে ওভটি যাবলগীয়াত পৰে৷ যাৰ ফলত এইসকল ছাত্ৰ-ছাত্ৰী কম্পাৰ্টমেন্টেল পৰীক্ষাতোত অনুত্তীৰ্ণ হোৱাটো খাটাং হৈ পৰিল৷ জানিব পৰামতে ছেবাই প্ৰথমখন পৰীক্ষাসূচী প্ৰকাশ কৰাৰ কেইদিনমান পিছতে দ্বিতীয় এখন সূচী প্ৰকাশ কৰি কোনবোৰ ইলেকটিভ বিষয়ৰ পৰীক্ষা কোনদিনা অনুষ্ঠিত কৰা হ’ব সেয়া স্পষ্ট কৰি দিছিল যদিও সংশ্লিষ্ট বিদ্যালয়ৰ প্ৰধান শিক্ষকসকলৰ লগতে ছাত্ৰ-ছাত্ৰীসকলৰো সেই পৰীক্ষাসূচী চকুত নপৰিল৷
যাৰফলত আজি ৰঙিয়াত হিন্দী বিষয়ৰ পৰীক্ষা দিবলৈ আহি পৰীক্ষাত অৱতীৰ্ণ হোৱাৰ পৰা বঞ্চিত হ’বলগীয়া হ’ল পৰীক্ষাৰ্থীসকল৷ এইক্ষেত্ৰত পৰীক্ষাৰ্থীসকলে এনে দুৰ্দশাৰ বাবে নিজ নিজ বিদ্যালয়ৰ মুৰব্বীৰ উপৰি ছেবাক জগৰীয়া কৰিলে৷ পৰীক্ষাৰ্থীসকলে কিছু সময় পৰিস্থিতি উত্তপ্ত কৰি তোলে যদিও পিছত উপায়বিহীন হৈ ঘৰলৈ ওভটি যাবলৈ বাধ্য হয়৷ পৰীক্ষাৰ্থীসকলে বিফল মনোৰথ লৈ ওভটি যাবলগীয়া হোৱা ঘটনাই তীব্ৰ প্ৰতিক্ৰিয়াৰ সৃষ্টি কৰিছে৷
