তামুলপুৰঃ অসম নাট্য সন্মিলনৰ তামুলপুৰ শাখাৰ উদ্যোগত তামুলপুৰ ৰাজহুৱা প্ৰেক্ষাগৃহত আজিৰে পৰা আৰম্ভ হৈছে ১০দিনীয়া নাট কৰ্মশালা। আজিৰে পৰা ১৬ জুলাইলৈ চলিব লগীয়া নাট কৰ্মশালাখন আজি পুৱা ৯ বজাত বাক্সা জিলা সাহিত্য সভাৰ সভাপতি ব্ৰজেন্দ্ৰ নাথ ডেকাই বন্তি প্ৰজ্বলন কৰি আনুষ্ঠানিকভাৱে শুভাৰম্ভ কৰে। তাৰপিছতে নটৰাজৰ প্ৰতিচ্ছৱিত মাল্যাৰ্পন কৰে তামুলপুৰ জিলা বিপিএফৰ সভাপতি কেশৱ ৰাজবংশীয়ে।
৯.৩০ বজাত নাট কৰ্মশালাখনি শুভ উদ্বোধন কৰে তামুলপুৰৰ প্ৰবীণ নাট্যকৰ্মী মোহন দাসে। দহ দিনীয়া নাট কৰ্মশালা পৰিচালনা সমিতিৰ সভাপতি অভিজিৎ দাস আঁত ধৰা উদ্বোধনী সভাত কৰ্মশালাখনিৰ প্ৰশিক্ষক এন এছ ডি,ছিকিমৰ স্নাতক কুলদীপ চহৰীয়াই চমু ভাষণ প্ৰদান কৰে। আজিৰ সভাত প্ৰশিক্ষাৰ্থীসকলৰ লগতে বিশিষ্ট নাট্যকৰ্মী মদন মোহন শৰ্মা, চমেন পাঠক, বোলছৱি অভিনেতা মৃণাল দাস, অসম নাট্য সন্মিলন তামুলপুৰ শাখাৰ সভাপতি প্ৰফুল্ল চন্দ্ৰ মহন্ত, বৈকুণ্ঠ কলিতাকে ধৰি কেবাজনো জ্যেষ্ঠ নাগৰিক উপস্থিত থাকে।
