হৃদয় বিদাৰকঃ তিতাবৰত পলকতে নাইকিয়া হৈ গ'ল এগৰাকী মাতৃৰ একমাত্ৰ পুত্ৰ

তিতাবৰঃ তিতাবৰ ন-আলি তিনি আলিৰ মছজিদৰ সমীপত সংঘটিত হয় এক শোকাৱহ পথ দুৰ্ঘটনা। এখন বাইক আৰু এখন টেংকাৰৰ মাজত হোৱা মুখামুখী সংঘৰ্ষৰ ফলত নিহত হয় বাইক চালক শ্বাহমিৰান হুছেইন। তিতাবৰ মিহিৰাম শইকীয়া উচ্চতৰ মাধ্যমিক বিদ্যালয়ৰ নৱম শ্ৰেণীৰ ছাত্ৰ আছিল শ্বাহমিৰান হুছেইন। তিতাবৰ তিনিআলি দিশৰ পৰা এখন Honda Stunner বাইকত একে বিদ্যালয়ৰে পপী দত্ত নামৰ ছাত্ৰীগৰাকীৰ সৈতে তিতাবৰ চাৰিআলি দিশে গৈ থকা অৱস্থাত মৰিয়নিৰ পৰা গোলাঘাট দিশে আহি থকা NL-07-A-3637 নম্বৰৰ টেংকাৰখনৰ লগত হোৱা সংঘৰ্ষৰ ফলত দুয়ো গুৰুতৰ ভাবে আহত হয়।

গুৰুতৰ ভাবে আহত দুয়োকে ততাতৈয়াকৈ তিতাবৰ অসামৰিক চিকিৎসালয়ত ভৰ্তি কৰে যদিও চিকিৎসালয়তে অকাল মৃত্যুক সাৱতে ছাত্ৰজনে। গুৰুতৰ ভাবে আহত ছাত্ৰীগৰাকীক চিকিৎসকে উন্নত চিকিৎসাৰ বাবে যোৰহাট চিকিৎসা মহাবিদ্যালয়লৈ প্ৰেৰণ কৰে। উল্লেখযোগ্য যে কিছুদিনৰ পূৰ্বে ছাত্ৰজনৰ পিতৃৰ বিয়োগ হৈছিল। একমাত্ৰ পুত্ৰ আৰু মাতৃয়ে এখন দোকান খুলি জীৱন যাপন কৰি আছিল যদিও আজি অহা হঠাৎ এটা খবৰে অমানিশা নমাই আনিলে মাতৃগৰাকীৰ জীৱনলৈ৷