বৰপেটা বিদ্যুৎ উপ সংমণ্ডল কাৰ্যালয় ঘেৰাও ক্ষুব্ধ জনতাৰ

বৰপেটাঃ বৰপেটা বিদ্যুৎ উপ সংমণ্ডলৰ উপ সংমণ্ডল বিষয়া ধৰনীধৰ কলিতাৰ ম‌ইমতালিত অতিষ্ঠ হৈ একাংশ লোকে বৰপেটা বিদ্যুৎ উপ সংমণ্ডলৰ কাৰ্যালয় ঘেৰাও কৰে। বিগত ছয় দিন ধৰি বৰপেটা ছয় নম্বৰ ৱাৰ্ডত বিদ্যুৎ সংযোগ ব্যাহত হৈ থকাৰ ফলত সৰ্বসাধাৰণ ৰাইজ আহুকালৰ সন্মুখীন হয়। এই সংক্ৰান্তত উপ সংমণ্ডল বিষয়াজনক ৰাইজে ফোন কৰিলে তেখেতৰ মোবাইল চুইছ অফ হৈ থাকে।

কিছুমান কৰ্মচাৰী আৰু এখোপ চৰা তেওঁলোকক সমস্যা সংক্ৰান্তত ফোন কৰিলে দেখুৱায় বিভিন্ন অজুহাত। ইয়াকে কেন্দ্ৰ কৰি বৰপেটা বিদ্যুৎ উপ সংমণ্ডল কাৰ্যালয়ত উত্তপ্ত পৰিস্থিতিৰ সৃষ্টি হয়। একাংশ লোকে বিদ্যুৎ কৰ্মচাৰীৰ ফালে চোঁচা লয়। এই উত্তপ্ত পৰিস্থিতিৰ সময়তেই উপ সংমণ্ডল বিষয়াজন কাৰ্য্যালয় এৰি পলায়ন কৰে। পিছত একাংশ লোকে কণিষ্ঠ অভিযন্তাৰ কাৰ্য্যালয়ত প্ৰৱেশ কৰি অনতিপলমে বিদ্যুৎ যোগান নিয়মীয়া কৰাৰ বাবে আহ্বান জনায়৷