গোলকগঞ্জঃ ধুবুৰী জিলাৰ গোলকগঞ্জ ৰাষ্ট্ৰীয় ঘাইপথত আজি সংঘটিত এক পথ দুৰ্ঘটনাত দুজন লোক আহত হোৱাৰ লগতে দুৰ্ঘটনাগ্ৰস্ত গাড়ী খনৰ পৰা ৰহস্যজনকভাৱে ১৪ টাকৈ চোৰাং গৰু উদ্ধাৰ হোৱা ঘটনাই অঞ্চলটোত এক চাঞ্চল্যৰ সৃষ্টি কৰিছে। প্ৰাপ্ত বাতৰি মতে হালাকুৰাৰ পৰা ১৪ টা গৰুভৰ্তি এ এছ ১৭ চি/০৩৪৬ নম্বৰৰ বলেৰ’ পিক-আপ ভান এখনে গৌৰীপুৰ অভিমুখে গৈ থকা অবস্থাত গোলকগঞ্জ থানাৰ অন্তৰ্গত নান্দনীপাৰ সংলগ্ন ৩১ নং ৰাষ্ট্ৰীয় ঘাইপথত এ এছ ১৭ এ/৩৬০৯ নম্বৰৰ গ্লেমাৰ বাইক এখনক খুন্দা মাৰি বাইকসহ গৰুভৰ্তি ভানখনে পথৰ কাষৰে দ খাৱৈত পৰে।
ফলত বাইক আৰোহীৰ লগতে গৰুভৰ্তি ভানখনৰ চালক ছফিকুল আলী(২৫) আহত হয়। এই পথ দুৰ্ঘটনাৰ খবৰ পাই আৰক্ষী ঘটনা স্থলিত উপস্থিত হৈ ৰাইজৰ সহযোগত আঘাতপ্ৰাপ্ত দুয়োকে গোলকগঞ্জ চিকিৎসালয়লৈ নিয়ে। চিকিৎসকে প্ৰাথমিক চিকিৎসা কৰাৰ পিছত উন্নত চিকিৎসাৰ বাবে ধুবুৰী অসামৰিক চিকিৎসালয় লৈ প্ৰেৰণ কৰে। ইপিনে ভানখনত অবৈধভাৱে নি থকা ১৪ টা চোৰাং গৰুৰ ভিতৰত ৩ টা গৰু আহত হোৱাত আৰক্ষীয়ে স্থানীয় পশু চিকিৎসকৰ দ্বাৰা গৰু তিনিটাৰ লগতে আটাইকেইটাক চিকিৎসা প্ৰদান কৰায়। উল্লেখযোগ্য যে ভানখনত চোৰাং গৰু কঢ়িওৱাৰ অপৰাধত হেণ্ডিমেন মোত্তালেবক গ্ৰেপ্তাৰ কৰি থানালৈ নিয়ে।
