গোসাইগাঁওঃ কোকৰাঝাৰ জিলাৰ গোসাইগাঁও মহকুমাৰ গুৰুফেলা ৩১ নম্বৰ ৰাষ্ট্ৰীয় ঘাইপথত শনিবাৰে পুৱা এজন অটো চালকে বিহাৰৰ এগৰাকী কিশোৰক উদ্ধাৰ কৰে৷ কিশোৰগৰাকী বিহাৰৰ বৈশী জিলাৰ বাৰছই থানাৰ অন্তৰ্গত পুৰনাগই গাঁৱৰ মোঃ তছলিম আলম আৰু সৰ্জন খাতুনৰ কণিষ্ঠ পুত্ৰ তথা মাদ্ৰাছাৰ পঞ্চম শ্ৰেনীৰ ছাত্ৰ মোঃ মোহাজ্জম আলম বুলি কিশোৰগৰাকীয়ে পৰিচয় দিয়ে৷
জানিব পৰা মতে মহকুমাটোৰ দুই নম্বৰ জয়মাৰ নিবাসী অটো চালক আমিন আলীয়ে নিজ অটোত গুৰুফেলা অটো আস্থানত ৰৈ থকাৰ সময়ত কিশোৰগৰাকী হঠাৎ দৌৰি গৈ তেওঁক সাৱটি ধৰে আৰু কান্দে৷ পিছত আলীয়ে ঘৰ ক’ত বুলি প্ৰশ্ন কৰাত কিশোৰগৰাকীয়ে কয় যে শুকুৰবাৰে পুৱা ১০ মান বজাত তেওঁ নিজ গৃহৰ পৰা মাদ্ৰাছালৈ গৈ থকাৰ সময়ত এগৰাকী অচিনাকী ব্যক্তিয়ে তেওঁক গাড়ীত উঠাই অপহৰণ কৰি লৈ আহে৷
কালি ব্যক্তিজনে কিশোৰগৰাকীক মহকুমাটোৰ ভোদেয়াগুৰিস্থিত পেট্ৰ’ল পাম্পৰ সন্মুখত ৩১ নম্বৰ ৰাষ্ট্ৰীয় ঘাইপথত এৰি থৈ যায়৷ কিশোৰগৰাকীয়ে দিক-বিদিক হেৰুৱাই এখন অটো ৰিক্সাইদি গুৰুফেলাত উপস্থিত হয়৷ পিছত আলীয়ে কিশোৰ গৰাকীক গোসাইগাঁও সদৰ থানালৈ লৈ যায়৷
