ৰঙিয়াঃ অসমৰ সাংস্কৃতিক জগতৰ প্ৰবাদ পুৰুষ নটসূৰ্য ফণী শৰ্মাৰ পূণ্য স্মৃতিত অসম চৰকাৰে আগবঢ়োৱা ২০১৯ বৰ্ষৰ 'নটসূৰ্য ফণী শৰ্মা বঁটা’ প্ৰদান কৰা হ'ব প্ৰথিতযশা নাট্যশিল্পীদ্বয় ক্ৰমে দুলাল ৰয় আৰু আৰতি দাস বৈৰাগীক। অসম চৰকাৰৰ সাংস্কৃতিক সঞ্চালকালয়ৰ উদ্যোগত কামৰূপ জিলা আৰু ৰঙিয়া মহকুমা প্ৰশাসনৰ সহযোগত অহা ৩১ জুলাইত দিনৰ আঢ়ৈ বজাত ৰঙিয়া পেৰেড গ্ৰাউণ্ডত আয়োজিত এই বঁটা প্ৰদান অনুষ্ঠানত মুখ্য অতিথিৰ আসন অলংকৃত কৰিব অসমৰ মুখ্যমন্ত্ৰী সৰ্বানন্দ সোণোৱালে। উক্ত অনুষ্ঠানত সন্মানীয় অতিথি ৰূপে উপস্থিত থাকিব অসম চৰকাৰৰ সাংস্কৃতিক পৰিক্ৰমা বিভাগৰ মন্ত্ৰী নৱ কুমাৰ দলে আৰু জলসিঞ্চন বিভাগৰ মন্ত্ৰী ভৱেশ কলিতা। বিশিষ্ট অতিথি ৰূপে থাকিব মঙ্গলদৈ লোকসভা সমষ্টিৰ সাংসদ দিলীপ শইকীয়া আৰু কমলপুৰ বিধানসভা সমষ্টিৰ বিধায়ক সত্যব্ৰত কলিতা।
এই অনুষ্ঠানটি সাফল্য মণ্ডিত কৰি তুলিবলৈ কামৰূপৰ উপায়ুক্ত কমল কুমাৰ বৈশ্য, সাংস্কৃতিক পৰিক্ৰমা সঞ্চালকালয়ৰ সঞ্চালক বিষ্ণু কমল বৰা, ৰঙিয়া মহকুমাৰ মহকুমাধিপতি মুনীন্দ্ৰ বৰদলৈয়ে ব্যাপক তৎপৰতা গ্ৰহণ কৰা পৰিলক্ষিত হৈছে। আজি মহকুমাধিপতি মুনীন্দ্ৰ বৰদলৈৰ সঞ্চালনাত ৰঙিয়া মহকুমাৰ মহকুমাধিপতি কাৰ্যালয়ৰ সভাকক্ষত বঁটা প্ৰদান অনুষ্ঠানটি সন্দৰ্ভত এখন গুৰুত্বপূৰ্ণ বৈঠক অনুষ্ঠিত হয়। বৈঠকত উপস্থিত থাকে ৰঙিয়া পৌৰসভাৰ সভানেত্ৰী সীমা বিশ্বাস, সহকাৰী আয়ুক্ত জয়ন্ত দাস, মহকুমা নিৰ্বাচন বিষয়া ৰিপণ জ্যোতি নাথ, সহকাৰী আয়ুক্ত চম্পক ডেকা, মহকুমা আৰক্ষী বিষয়া কংকন কুমাৰ নাথ, মহকুমা স্বাস্থ্য বিষয়া চৈয়দ চফিকুল হক প্ৰমূখ্যে মহকুমাটোত থকা বিভিন্ন বিভাগৰ মুৰব্বী বিষয়াসকল।
