লংকা ষ্টেচনৰ সমীপত মৃতদেহ উদ্ধাৰ

লংকাঃ লংকা ষ্টেচনৰ সমীপৰ পিতনীত আজি পুৱা এটা মৃতদেহ উদ্ধাৰ হয়| পথৰ কাষতে থকা পিতনীত তলমূৰকৈ পৰি থকা অৱস্থাত মৃতদেহটো স্থানীয় লোকে প্ৰত্যক্ষ কৰে। শৰীৰৰ কাপোৰ চিনাক্ত কৰি মৃতদেহটো ওচৰৰে ৫নং ৱাৰ্ডৰ গোপাল মণ্ডলৰ বুলি চিনাক্ত কৰিছে পৰিয়ালৰ লোকে। বিগত দেওবাৰৰ পৰাই গোপাল মণ্ডল ঘৰৰ পৰা নিৰুদ্দেশ হৈ আছিল। মিঠাইৰ দোকানত কাম কৰি থকা গোপাল মণ্ডলে অত্যধিক সুৰাপান কৰিছিল।

মৃত্যুৰ কাৰণ পোহৰলৈ অহা নাই যদিও অত্যধিক সুৰা পান কৰিয়েই এনেদৰে পথৰ কাষত থকা পিতনীত পৰি মৃত্যু হোৱাৰ সন্দেহ কৰিছে। ঘটনাস্থলীত লংকা আৰক্ষী আৰু জিআৰপিএফ উপস্থিত হৈছিল যদিও দুয়ো আৰক্ষীয়ে তেওঁলোকৰ অঞ্চল নোহোৱা বুলি দায় সাৰিবলৈ চেষ্টা কৰি এই পৰ্যন্ত উদ্ধাৰকৰা নাই মৃতদেহটো।