স্বাধীনতা দিৱসৰ প্ৰাকক্ষণত যোগীঘোপাৰ নদীপথত কটকটীয়া নিৰাপত্তা

যোগীঘোপাঃ মাজত মাথোঁ কেইটামান ঘণ্টা বাকী, দেশৰ প্ৰতিজন লোকে উদযাপন কৰিব ৭৩ সংখ্যক স্বাধীনতা দিৱস। আগন্তুক স্বাধীনতা দিৱসক লৈ তৎপৰ হৈ পৰিছে বঙাইগাঁও জিলাৰ আৰক্ষী প্ৰশাসন। স্বাধীনতা দিৱসৰ প্ৰস্তুতিৰ লগতে বঙাইগাঁও জিলা প্ৰশাসনে নিৰাপত্তা ব্যৱস্থা অধিক কটকটীয়া কৰি তুলিছে। কি স্থলপথ, কি জলপথ, সকলোতে এতিয়া কটকটীয়া নিৰাপত্তা।

যিসময়ত নামনি অসমত মৌলবাদী নিষিদ্ধ ঘোষিত সংগঠনৰ ৫ জনকৈ সদস্য অসম আৰক্ষীয়ে আটক কৰিবলৈ সক্ষম হৈছে, ঠিক তেনে সময়তে আৰক্ষীয়ে নিৰাপত্তা দিশটো যথেষ্ট কটকটীয়া কৰিছে। বঙাইগাঁও জিলাৰ যোগীঘোপাৰ মহাবাহু ব্ৰহ্মপুত্ৰ নদীত পঞ্চৰত্ন নদী আৰক্ষী দিন-নিশা একাকাৰ কৰি নিজৰ দায়িত্ব সুচাৰুৰূপে পালন কৰা পৰিলক্ষিত হৈছে। কোনো উগ্ৰপন্থী অথবা কোনো কুটাঘাতকাৰীয়ে যাতে নদীপথৰ দ্বাৰা কুটাঘাত সংঘটিত কৰিব নোৱাৰে তাৰ বাবে আৰক্ষীয়ে তীক্ষ্ণ দৃষ্টি ৰাখিছে।