বৰপেটাঃ মহাত্মা গান্ধীৰ আদৰ্শেৰে অনুপ্ৰাণিত হৈ দেশৰ বাবে মহৎ ত্যাগ স্বীকাৰ কৰিও প্ৰচাৰ বিমুখ স্বাধীনতা সংগ্ৰামী তথা বৰপেটা জিলাৰ সৰভোগৰ বাসিন্দা অঞ্জনা বৰুৱাক আজি সৰভোগত সম্বৰ্ধনা জনায় ৷ এন ই লাইভ ট্যুডেৰ উপ সম্পাদক সাংবাদিক ছহিজুল আলীৰ প্ৰচেষ্টাত সৰভোগৰ পৰিদৰ্শন গৃহত প্ৰচাৰ বিমুখ স্বাধীনতা সংগ্ৰামী গৰাকীক বিশেষভাবে সম্বৰ্ধনা জনায় "গ্ৰীণফ্লাস ফাউণ্ডেচন" নামৰ এটি স্বেচ্ছাসেৱী সংগঠনে৷ অনুষ্ঠানটোত স্বাধীনতা সংগ্ৰামীগৰাকীক ফুলাম গামোছা, মানপত্ৰৰে সম্বৰ্ধনা জনোৱা হয়৷
স্বেচ্ছাসেৱী সংগঠনটোৰ সম্পাদক ওমৰ ফাৰুকে আঁত ধৰা অনুষ্ঠানটোত গ্ৰীণফ্লাস ফাউণ্ডেচনৰ মুখ্য উপদেষ্টা দীপান্বিতা মুখাৰ্জী খানে কয় যে, স্বাধীনতা সংগ্ৰামৰ লগত জড়িত অঞ্জনা বৰুৱাই আজিলৈকে চৰকাৰৰ পৰা কোনো ধৰণৰ স্বীকৃতি লাভ নকৰাতো আশ্চৰ্যৰ বিষয়৷ এইক্ষেত্ৰত স্বাধীনতা সংগ্ৰামীগৰাকীক যথোযিত সন্মান প্ৰদান কৰাৰ বাবে তেওঁ চৰকাৰক আহ্বান জনায়৷ অনুষ্ঠানত বৰপেটা জিলা ডিজিটেল সাংবাদিক সন্থাৰ কাৰ্যকৰী সভাপতি পুলেন্দ্ৰ দাস, সমাজসেৱিকা সুজাতা সিং আহমেদ, স্বেচ্ছাসেৱী সংগঠনটোৰ সভাপতি জাকিৰ হুছেইনৰ লগতে কেইবাগৰাকী সংবাদকৰ্মী উপস্থিত থাকে ৷
