যোৰহাটঃ আজি ৭৩ সংখ্যক স্বাধীনতা দিৱস। সমগ্ৰ দেশৰ লগতে যোৰহাটতো উলহ মালহেৰে উদযাপন কৰিলে স্বাধীনতা দিৱস। যোৰহাটৰ কাছাৰী ময়দানত স্বাধীনতা দিৱস উপলক্ষে জাতীয় পতাকা উত্তোলন কৰে ৰাজ্যৰ শিক্ষামন্ত্ৰী সিদ্ধাৰ্থ ভট্টাচাৰ্যই। যোৰহাট জিলা প্ৰশাসনৰ উদ্যোগত অনুষ্ঠিত হোৱা আজিৰ স্বাধীনতা দিৱসৰ অনুষ্ঠানত এনচিচি, স্কাউট এণ্ড গাইডৰ লগতে যোৰহাটৰ বহুকেইখন শিক্ষা প্ৰতিষ্ঠানে পেৰেডত অংশগ্ৰহণ কৰে।
আজিৰ এই অনুষ্ঠানত বিভিন্ন সাংস্কৃতিক অনুষ্ঠান পৰিবেশন কৰে কেইবাটাও শিল্প দলে। উল্লেখ যে ভাৰতৰ স্বাধীনতা সংগ্ৰামত অংশগ্ৰহণ কৰা কেইবাজনো মুক্তিযোদ্ধাক সম্বৰ্ধনা জনোৱাৰ লগতে নিজৰ কৰ্মৰে উজ্বলি উঠা কেইবা গৰাকীও ব্যক্তিক সম্বৰ্ধনা জনোৱা হয়। আজিৰ এই অনুষ্ঠানত সিদ্ধাৰ্থ ভট্টাচাৰ্যৰ লগতে যোৰহাট জিলা উপায়ুক্ত ৰৌশ্নি অপৰাঞ্জেয় কাৰাটে, আৰক্ষী অধীক্ষক বৈভৱ নিম্বলকাৰকে ধৰি কেইবাজনো বিশিষ্ট ব্যক্তি উপস্থিত থাকে।
