গোলাঘাটঃ দেশৰ ৭৩ সংখ্যক স্বাধীনতা দিৱসৰ লগত সংগতি ৰাখি এক নিৰপেক্ষ সামাজিক মাধ্যম ''গোলাঘাট কমাৰবন্ধাৰ টুকুৰা খবৰ'' গোটে কমাৰবন্ধা তমহা বিদ্যালয়, কমাৰবন্ধা-দক্ষিণ হেঙ্গেৰা সংযোগী পথৰ অট' সন্থা আৰু ''যাত্ৰা''ৰ সহযোগত বৃহত্তৰ কমাৰবন্ধা অঞ্চলৰ বহু কেইজন ব্যক্তিক আনুষ্ঠানিক সম্বৰ্ধনা জনায়। যি সকলৰ কৰ্মই গ্ৰাম্য অৰ্থনীতি টনকিয়াল হোৱাত এক গুৰুত্বপূৰ্ণ ভূমিকা পালন কৰাৰ লগতে স্বাৱলম্বী হোৱাৰো এক সুন্দৰ নিদৰ্শন দাঙি ধৰিছে সেই সকল ব্যক্তিক আনুষ্ঠানিক সম্বৰ্ধনা জনায়।
তেওঁলোকৰ কোনোজনে চুলি কাটে, চানা বিক্ৰি কৰে, কুহিয়াৰ ৰস বিক্ৰি কৰে। লগতে আনুষ্ঠানিক সম্বৰ্ধনা জনোৱা হয় অসম চৰকাৰৰ পৰা ক্ৰীড়া পেঞ্চন লাভ কৰিবলৈ সক্ষম হোৱা গোঁহাইগাৱঁৰ দুৰ্গা বৰাক। গোটৰ এডমিন বিদ্যুৎ বিকাশ বৰাই আঁত ধৰা সম্বৰ্ধনা অনুষ্ঠানটিত সভাপতিত্ব কৰে কমাৰবন্ধা মহাবিদ্যালয়ৰ প্ৰতিষ্ঠাপক অধ্যক্ষ দেৱেশ্বৰ গগৈয়ে। উদেশ্য ব্যাখ্যা কৰে ৰঞ্জিত বৰাই।
অনুষ্ঠানটিত বিশিষ্ট ব্যক্তিৰূপে উপস্থিত থাকে কমাৰবন্ধা মহাবিদ্যালয়ৰ অধ্যক্ষ অতুল শইকীয়া, কমাৰবন্ধা কণিষ্ঠ মহাবিদ্যালয়ৰ অৱসৰপ্ৰাপ্ত অধ্যক্ষ পূৰ্ণকান্ত বৰা, আঠাবাৰী সংস্কৃত টোলৰ অৱসৰপ্ৰাপ্ত প্ৰধান শিক্ষক গুনেন বৰা, অৱসৰপ্ৰাপ্ত বিষয় শিক্ষক সুৰেন্দ্ৰনাথ নেওগ, বিশিষ্ট অধিবক্তা জয়ন্ত গোস্বামীৰ লগতে বহুকেইজন গণ্য-মান্য ব্যক্তি। অনুষ্ঠানটিত সম্বৰ্ধিত ব্যক্তিসকল ক্ৰমে সৰ্বশ্ৰী দুৰ্গা বৰা, লীলা শইকীয়া, দেৱ গগৈ, কৰুণা বৰা, বীৰেণ বৰা, জয়ন্ত গগৈ, মহেশ্বৰী ফুকন, দিব্যজ্যোতি বৰা, জয়ন্তজিৎ বৰা, হেমন্ত বৰদলৈ।
