বৰপেটাঃ সত্ৰ নগৰী বৰপেটাৰ সু-সন্তান তথা "একাডেমি অব্ খোল বাদ্য"ৰ মুখ্য প্ৰশিক্ষক গুৰু মনোজ কুমাৰ দাস শুকুৰবাৰে আহি পালে সত্ৰ নগৰী বৰপেটা৷ তাৰ পিছতে আৰম্ভ হয় "একাডেমি অব্ খোল বাদ্য"ৰ কণ কণ শিশু শিল্পীসকলৰ আদৰণি যাত্ৰা৷ সম্পূৰ্ণ সত্ৰীয়া পৰম্পৰাগত সাজ পিন্ধি নৱ-প্ৰজন্মই ভৰি পৰে বৰপেটা আৰু ৰজনজনাই উঠে খোল বাদ্যৰ ধ্বনিৰে৷
আদৰণি যাত্ৰাৰ শেষৰ ক্ষণত বৰপেটা ৰাইনো ক্লাৱৰ বাকৰিত এখনি সম্বৰ্ধনা অনুষ্ঠান অনুষ্ঠিত হয়৷ অনুষ্ঠানটোত মূখ্য অতিথি হিচাপে উপস্থিত থাকে মাধৱ চৌধুৰী মহাবিদ্যালয়ৰ প্ৰাক্তন মুৰব্বী অধ্যাপক ডঃ বাবুল চন্দ্ৰ দাস, সুন্দৰীদিয়া সত্ৰৰ বুঢ়া সত্ৰাধিকাৰ জগন্নাথ দেৱ অধিকাৰী, বিশিষ্ট শিক্ষাবিদ অক্ষয় কুমাৰ মিশ্ৰ আৰু মাধৱ চৌধুৰী মহাবিদ্যালয়ৰ প্ৰাক্তন অধ্যক্ষ অৰ্জুন চন্দ্ৰ দাস৷
"একাডেমি অব্ খোল বাদ্য"ৰ লগতে তাঁতিকুছি, ক্লাব ৰাইনো, ভাৰতীয় জনতা পাৰ্টিয়েও তেওঁক সম্বৰ্ধনাৰ লগতে শুভেচ্ছা জনায়৷ একাংশ নৱ-প্ৰজন্ম, অভিভাৱক-অভিভাবিকাসকলৰ লগতে ক্লাৱ ৰাইনো সদস্য বৃন্দয়ো তেওঁক সম্বৰ্ধনা জনায়৷
