জামুগুৰিহাটঃ মিছন চাইনাৰ অভূতপূৰ্ৱ সফলতাৰ পিছত জুবিন গাৰ্গৰ নতুন ছবি কাঞ্চনজংঘাৰ মুক্তিৰ প্ৰাকমুহূৰ্তত নৱতম ছবিখনক লৈ প্ৰচাৰ চলোৱা যুৱ প্ৰজন্মৰ হাৰ্টথ্ৰৱ জুবিন গাৰ্গ অহা ছয় ছেপ্টম্বৰত মুক্তি লাভ কৰিবলগীয়া ছবিখনৰ প্ৰচাৰৰ বাবে বুধবাৰে বিয়লি জামুগুৰিহাটৰ ত্যাগবীৰ হেমবৰুৱা মহাবিদ্যালয়ত উপস্থিত হয়। জনপ্ৰিয় শিল্পীগৰাকী মহাবিদ্যালয়খনত উপস্থিত হোৱাৰ পিছতেই এক উৎসৱমুখৰ পৰিবেশৰ সৃষ্টি হয় সমগ্ৰ মহাবিদ্যালয়ৰ চৌহদত।
জনপ্ৰিয় কণ্ঠশিল্পীগৰাকীক নিচেই কাষৰ পৰা চাবলৈ অধিৰ অপেক্ষাৰে ৰৈ থকা ছাত্ৰ-ছাত্ৰীসকলে শিল্পীগৰাকী মহাবিদ্যালয়খনত উপস্থিত হোৱাৰ পাছতে ছাত্ৰ-ছাত্ৰীসকলৰ মাজত হৰ্ষোল্লাসৰ পৰিবেশে বিৰাজ কৰে৷ জুবিনক নিচেই কাষতে পাই আনন্দত আত্মহাৰা হৈ পৰা ছাত্ৰ-ছাত্ৰীসকলে জুবিনৰ সৈতে ম’বাইলত একপি চেলফি লৈ স্মৃতি যুগমীয়া কৰি ৰখাৰ চেষ্টা চলাই হেতাওপৰা লগোৱা পৰিলক্ষিত হোৱাৰ উপৰি গছৰ ওপৰত উঠিও জুবিনক চোৱা দেখা পোৱা যায়৷ ছবিখনৰ দুটাকৈ সদ্যমুক্তিপ্ৰাপ্ত জনপ্ৰিয় গীত পৰিৱেশন কৰি জুবিনে ছাত্ৰ-ছাত্ৰীসকলক আপ্লুত কৰি তোলাৰ লগতে ছবিখন চাবলৈ ছবিগৃহলৈ যাবলৈ সকলোকে আহ্বান জনায়৷
