হাউলীঃ বৰপেটা জিলাৰ হাউলী আৰক্ষী থানাৰ অন্তৰ্গত ইটাৰভিটা গাঁৱত মঙলবাৰে নিশা প্ৰায় ডেৰমান বজাত মহিলাৰ ওপৰত অমানুষিক নিৰ্যাতনৰ দৰে এক ঘটনা সংঘটিত হৈছে। জানিব পৰা মতে পূৰ্বৰ আখেজ অনুসৰি মঙলবাৰে নিশা স্বামী ঘৰত নথকাৰ সুযোগ লৈ এ,এচ ১৫ ডি ২৫৩৮ নম্বৰৰ মাৰুতী আৰু অজ্ঞাত নম্বৰৰ তিনিখন বাইকেৰে অহা ১২ জনীয়া এটা দুৰ্বৃত্তৰ দলে ইটাৰভিটা গাঁৱৰ হাবেজ উদ্দিনৰ ঘৰত উপস্থিত হৈ হাউলী আৰক্ষী থানাৰ মানুহ বুলি পৰিচয় দি দৰ্জা খুলিবলৈ কয়।
পিছত হাবেজ উদ্দিনৰ পত্নী ৰুকীয়া খাতুনে দৰ্জা খুলি দিয়াৰ লগে লগে দুৰ্বৃত্তৰ দলটোৱে মহিলাগৰাকীক মুখত সোপা দি টানি চোঁচৰাই ঘৰৰ ভিতৰৰ পৰা বাহিৰ কৰি চোকা অস্ত্ৰৰে ঘপিওৱাৰ লগতে ৰডেৰে কোবাই মূৰ, কপাল, হাত আৰু কঁকালত আঘাত কৰে। আনকি ডিঙিত থকা সোণৰ চেইন আৰু ঘৰৰ ভিতৰত থকা কেইবা হাজাৰ টকা লুট কৰি লৈ যায় বুলি পৰিয়ালৰ লোকে জানিবলৈ দিছে। সম্প্ৰতি মহিলাগৰাকী বৰপেটা ফকৰউদ্দিন আলী আহমেদ মেডিকেল কলেজ এণ্ড হস্পিটেলত চিকিৎসাধীন হৈ আছে।
ঘটনা সন্দৰ্ভত হাউলী আৰক্ষী থানাত আঘাতপ্ৰাপ্ত ৰুকীয়া খাতুনৰ স্বামী হাবেজ উদ্দিনে ৩৮৮/১৯ নম্বৰৰ এটি গোচৰ দাখিল কৰিছে। ইতিমধ্যে আৰক্ষীয়ে এজাহাৰৰ ভিত্তিত তদন্ত অব্যাহত ৰাখিছে যদিও উক্ত ঘটনাৰ লগত জড়িত থকা আচামী এজনকো বৰ্তমানলৈকে গ্ৰেপ্তাৰ কৰিবলৈ সক্ষম হোৱা নাই। স্থানীয় ৰাইজে ঘটনাটোৰ নিৰপেক্ষ তদন্ত কৰি দোষী ব্যক্তিৰ বিৰুদ্ধে কাৰ্যকৰী ব্যৱস্থা গ্ৰহণৰ দাবী জনাইছে।
