নগাঁৱৰ বিশিষ্ট সমাজকৰ্মী মফিজ উদ্দিন চৌধুৰীৰ মৃত্যু

বটদ্ৰৱাঃ নগাঁও জিলাৰ ৰূপহী বালিকা গাঁৱৰ নিবাসী বিশিষ্ট সমাজকৰ্মী মফিজ উদ্দিন চৌধুৰী (৭২)ৰ দেওবাৰে পুৱা ৮.৩০ বজাত বাৰ্ধক্যজনিত কাৰণত নিজা বাসগৃহত শেষ নিশ্বাস ত্যাগ কৰে। সম্পূৰ্ণ জীৱন ইছলামিক নীতি-নিয়মৰ মাজেৰে জীৱন অতিবাহিত কৰা চৌধুৰী অঞ্চলটোৰ বিভিন্ন অনুষ্ঠান-প্ৰতিষ্ঠানৰ লগত জড়িত হৈ নিষ্ঠা সহকাৰে ৰাইজৰ সেৱা আগবঢ়াই আহিছিল।

দেওবাৰে বিয়লি ৫ বজাত বালিকা আঞ্চলিক ঈদগাহ ময়দানত সহস্ৰাধিক গুণমুগ্ধৰ  উপস্থিতিত  তেওঁৰ জানাজা নামাজ সম্পন্ন কৰা হয়। সৰবৰহী, মৃদুভাষী মফিজ উদ্দিন চৌধুৰীৰ মৃত্যুত বিভিন্ন জনে শোক প্ৰকাশ কৰে।  মৃত্যুৰ সময়ত তেওঁ পত্নী, চাৰিজন পুত্ৰ, দুগৰাকী কন্যাৰ লগতে বহুতো  আত্মীয় স্বজনক ইহসংসাৰত এৰি থৈ যায়। উল্লেখ্য যে প্ৰয়াত মফিজ উদ্দিন চৌধুৰী ৰূপহীহাট সমষ্টিৰ বিজেপি নেতা জাকাৰিয়া হক চৌধুৰীৰ পিতৃ আছিল।