কোকৰাঝাৰঃ বিপিএফ দলৰ এগৰাকী নেতা ভৰত শৰ্মাক নলবাৰীস্থিত ভাগশ্ৰী টাটা মটৰ শ্ব ৰূমৰ পৰা মোবাইল ফোনৰে ভাবুকি দিয়া এক ঘটনাই চাঞ্চল্যৰ সৃষ্টি কৰিছে৷ শ্ব ৰূমৰ পৰা অকস্মাৎ ভাবুকিৰ সন্মুখীন হোৱাত বিপিএফ নেতা তথা সমাজকৰ্মী ভৰত শৰ্মাই ঘটনাটোক লৈ আৰক্ষীৰ কাষ চপাই নহয় কোকৰাঝাৰ সদৰ থানাত এখন লিখিত এজাহাৰ দাখিল কৰিছে৷ অভিযোগ মতে ভৰত শৰ্মাই তেখেতৰ টাটা ইণ্ডিগো গাড়ীখন (এ এচ ১৬ এ ৩০০৫) কাৰিকৰী বিজুতিৰ বাবে টাটা মটৰৰ নলবাৰীস্থিত ভাগ্যশ্ৰী শ্ব ৰূমত যোৱা চাৰি মাহ আগতে ৰিপিয়াৰিঙত দিছিল৷
কিন্তু বিগত চাৰি মাহে গাড়ীখন শ্ব-ৰূমৰ সংশ্লিষ্ট পক্ষই সঠিকভাৱে মেৰামতি নকৰি শ্বৰূমৰ চালকৰ হতুৱাই গাড়ীখন ভৰত শৰ্মাৰ কোকৰাঝাৰস্থিত বাসগৃহত পঠিয়াই দিয়ে৷ তেতিয়া ভৰত শৰ্মাই ৰিপিয়াৰিং কৰা গাড়ীখন ক্ষন্তেক সময় চলাই গাড়ীখন সঠিক হোৱা নাই বুলি ঘূৰাই পঠায়৷ এই কাৰ্যত অগ্নিগৰ্ভা হৈ ভাগ্যশ্ৰী শ্ব ৰূমৰ পৰা মোবাইল ফোনযোগে গাড়ীখন ৰিচিভ কৰাৰ হেঁচা দি ব্যৰ্থ হোৱাত পুনৰাই বিপিএফৰ নেতা ভৰত শৰ্মাক অশ্লীল গালিগালাজ দি ক্ষান্ত নাথাকি তেখেতৰ শ্ব ৰূমৰ চালকক মাৰধৰ কৰি অপহৰণ কৰাৰ দৰে ভূৱা গোচৰ জাপি দিব আৰু চাই ল’ম বুলি প্ৰানৰ ভাবুকি দিয়ে৷
এনে কাৰ্যত গাড়ীৰ গৰাকী তথা বিপিএফৰ নেতা ভৰত শৰ্মাই কিংকৰ্তব্যবিমূৰ হৈ তৎক্ষনাত কোকৰাঝাৰ সদৰ থানাত উপস্থিত হৈ ভাগ্যশ্ৰী মটৰ শ্ব ৰূমৰ পৰা অহা ভাবুকিৰ বিৰুদ্ধে সংশ্লিষ্ট মোবাইল নম্বৰ দি এখন এজাহাৰ দাখিল কৰে৷ ইপিনে ভৰত শৰ্মাই নিজৰ টাটা ইণ্ডিগো গাড়ীখন (এ এচ ১৬ এ ৩০০৫) কাৰিকৰী বিজুতিৰ বাবে টাটা মটৰৰ নলবাৰীস্থিত ভাগ্যশ্ৰী শ্ব ৰূমত যোৱা চাৰি মাহ আগতে ৰিপিয়াৰিঙত দিছিল যদিও গাড়ীখন চমজি নলয় বুলি স্পষ্ট কৰি দিছে ভৰত শৰ্মাই৷
