শিক্ষকৰ অনিয়মীয়া উপস্থিতিয়ে বিপাঙত পেলাইছে শিক্ষাৰ্থীক

দলগাঁওঃ চৰকাৰী আমোলা বিষয়াৰ চূড়ান্ত অৱহেলাৰ সুযোগ গ্ৰহণ কৰি দলগাঁওত একাংশ বিদ্যালয়ৰ শিক্ষক কৰ্মচাৰীয়ে চলাই গৈছে মইমতালি। দৰং জিলাৰ দলগাঁও-শিয়ালমাৰী প্ৰাথমিক শিক্ষা খণ্ডৰ অন্তৰ্গত নমাটি প্ৰাথমিক বিদ্যালয়ত শিক্ষকৰ অনিয়মীয়া উপস্থিতিয়ে বিপাঙত পেলাইছে অভিভাৱক আৰু শিক্ষাৰ্থী সকলক। ডেৰ শতাধিক শিক্ষাৰ্থী থকা বিদ্যালয়খনত শিক্ষক মাত্ৰ দুজন। প্ৰধান শিক্ষক ইউছুফ আলী এন আৰ চিৰ দায়িত্বত থকাৰ বিপৰীতে সহকাৰী শিক্ষক চাহেদ আলী অকৰ্তৃত্বশীল ভাবে সুদীৰ্ঘ এমাহ ধৰি বিদ্যালয়ত অনুপস্থিত থকাত পাঠদান ব্যাহত হৈছে। আশ্চৰ্যজনকভাৱে স্বাস্থ্যজনিত কাৰণ দেখুৱাই কৰ্তব্যত গাফিলতি শিক্ষকৰ। শিক্ষা বিভাগৰ বৰমূৰীয়া সকলে শিক্ষকজনৰ বিৰুদ্ধে কি ব্যৱস্থা গ্ৰহণ কৰে সেয়া হ'ব লক্ষণীয় বিষয়।