তামুলপুৰঃ তামুলপুৰ আৰক্ষী থানাৰ অন্তৰ্গত ডিমলাপাৰত চোৰাং গৰুসহ মাৰুতি ভেন জব্দ। তামুলপুৰ আৰক্ষীৰ তহলদাৰী দল এটাই কালি নিশা প্ৰায় ১ বজাত এছ ০১ বি ৱাই ০৮৪১নম্বৰৰ মাৰুতি ভেন এখন তামুলপুৰ মটঙা চকত প্ৰত্যক্ষ কৰি গাড়ীখন ৰখাবলৈ দিয়াত আৰক্ষীৰ নিৰ্দেশ অমান্য কৰি পলাবলৈ চেষ্টা কৰে।
শেষত আৰক্ষীয়ে খেদি খেদি তামুলপুৰ ডিমলাপাৰ চকত গাড়ীখন ৰখাবলৈ সক্ষম হয় যদিও গৰু চোৰৰ দলটোৰ লগতে মাৰুতি ভেনখনৰ চালকজন পলাই যায়। আৰক্ষীয়ে তালাচী কৰি গাড়ীখনৰ ভিতৰত ভৰিত বন্ধা অৱস্থাত তিনিটা গৰু উদ্ধাৰ কৰিবলৈ সক্ষম হয়। গাড়ী নম্বৰৰ ওপৰত ভিত্তি কৰি গাড়ীখনৰ গৰাকী বিশ্বজিৎ বিশ্বাসক আৰক্ষীয়ে গ্ৰেপ্তাৰ কৰিবলৈ সক্ষম হয়।
ইতিমধ্যে তামুলপুৰ আৰক্ষীয়ে গৰুচোৰ আৰু গাড়ী চালকক কৰায়ত্ব কৰাৰ বাবে অভিযান আৰম্ভ কৰিছে। বৰ্তমান তামুলপুৰ আৰক্ষী থানাত পূৰ্বতে গৰু হেৰোৱা লোক উপস্থিত হৈ চোৰাং গৰু কেইটা প্ৰত্যক্ষ কৰে যদিও নিজৰ গৰু কেইটাও থানাত থকা বুলি গৰাকীয়ে ভিৰ কৰে।
