বিজনী: চিৰাঙ জিলাৰ বিজনীত এবছুয়ে কৃতী ছাত্ৰ-ছাত্ৰীক বঁটা বিতৰণৰ লগতে সম্বৰ্ধনা জনায়। সোমবাৰে চিৰাঙৰ বিজনীত নিখিল বড়ো ছাত্ৰ সন্থা চমুকৈ(এবছু)ৰ বিজনী আঞ্চলিক সমিতিয়ে বিজনী মহকুমা ভিত্তিত আয়োজন কৰা এই অনুষ্ঠানত বড়ো মাধ্যমৰ শীৰ্ষ ১২ গৰাকী ছাত্ৰ-ছাত্ৰীক প্ৰয়াত 'ছাঞ্জাৰাং ব্ৰহ্ম সোঁৱৰণী বঁটা-১৯' প্ৰদান কৰাৰ লগতে মহকুমাটোৰ অন্তৰ্গত প্ৰথম বিভাগত উত্তীৰ্ণ সকলো ছাত্ৰ-ছাত্ৰীক সম্বৰ্ধনা জনোৱা হয়।
বিজনী মহকুমাৰ পৰা যোৱা হাইস্কুল শিক্ষান্ত পৰীক্ষাত বড়ো মাধ্যমৰ ৯১৩ জন পৰীক্ষাৰ্থীয়ে পৰীক্ষা দিছিল যদিও ৪৪০ জন উত্তীৰ্ণ হয়। প্ৰথম বিভাগত ১০২ জন, দ্বিতীয় বিভাগত ২২৫ জন আৰু তৃতীয় ১১৩ জন উত্তীৰ্ণ হয়। বিজনীৰ শতকৰা উত্তীৰ্ণৰ হাৰ ৫২.১৪ জন।
এই বঁটা বিতৰণ তথা সম্বৰ্ধনা অনুষ্ঠানত এবছুৰ সভাপতি প্ৰমোদ বড়ো, সম্পাদক ফনিন বড়োকে আদি কৰি চিৰাং জিলা সমিতি আৰু বিজনী আঞ্চলিক সমিতি এবছুৰ কেইবাজনো নেতা উপস্থিত থাকে।
