কলগাছিয়াৰ কৈমাৰিত আৰক্ষীৰ অভিযানত বাইকসহ আটক চোৰ

কলগাছিয়া: বৰপেটা জিলাৰ কলগাছিয়া আৰক্ষী থানাৰ অন্তৰ্গত বালিকুৰী আৰক্ষী চকীৰ ভৰপ্ৰাপ্ত আৰক্ষী বিষয়া আব্দুল গণিৰ নেতৃত্বত মঙ্গলবাৰ সন্ধিয়া তালাচী চলাই কৈমাৰী গাঁৱৰ পৰা AS 01DF 1602 নম্বৰৰ এখন TVS Apache 180 চুৰি বাইক উদ্ধাৰ কৰিবলৈ সক্ষম হয়। এই বাইকখন টাপাজুলি পাথাৰ গাঁৱৰ ময়েজ উদ্দিনৰ পুত্ৰ জয়নাল আবদিনৰ পৰা উদ্ধাৰ কৰিবলৈ সক্ষম হয়।

জানিব পৰা মতে বালিকুৰিৰ পাগলা বজাৰৰ সামছুল নামৰ এজন ব্যক্তিৰ পৰা ৮ মাহ পূৰ্বে ৩১ হাজাৰ টকাৰে জয়নালে বাইকখন কিনি লৈছিল যদিও বাইকৰ নথি-পত্ৰখিনি জয়নালে খুজি থকাৰ পিছতো সামচুলে দিয়া নাছিল। সামছুল নামৰ মানুহজনে মাজে মাজে এনে ধৰণে কম দামত বাইক বিক্ৰী কৰি থাকে বুলি জানিব দিয়ে জয়নাল আবদিনে।

বাইকখনৰ আচল গৰাকী কামৰূপ জিলাৰ প্ৰীতম দে বুলি আৰক্ষীয়ে জানিবলৈ দিয়ে। জয়নালক বালিকুৰিৰ আৰক্ষীয়ে জেৰা অব্যাহত ৰাখিছে।