লখিমপুৰ: লখিমপুৰৰ ৰাজপথত আজি প্ৰতিবাদী কাৰ্যসূচী গ্ৰহণ কৰে অসম জাতীয়তাবাদী যুৱ পৰিষদে। লখিমপুৰৰ ১৫ নং ৰাষ্ট্ৰীয় ঘাইপথৰ পহুমৰাত পথ অৱৰোধ সংগঠনটোৰ। অসম জাতীয়তাবাদী যুৱ পৰিষদ লখিমপুৰ জিলা সমিতিৰ সহযোগত নাওবৈচা আঞ্চলিক সমিতিৰ উদ্যোগত ২ ঘণ্টীয়া প্ৰতিবাদী কাৰ্যসূচীৰে ৰাজপথ উত্তাল কৰে সংগঠনটোৱে।
নিপকো (neepco)ৰ বাঢ়নি পানীয়ে নাওবৈচা ৰাইজক হাৰাশাস্তি কৰাৰ প্ৰতিবাদত আৰু ভগ্ন মাথাউৰিৰ লগতে বাট-পথসমূহৰ অতি শীঘ্ৰে মেৰামতি কৰাৰ দাবী উত্থাপন কৰে সংগঠনটোৱে। লগতে তেওঁলোকে উল্লেখ কৰে যে বছৰি ৰঙানদীৰ বানত সৰ্বস্বান্ত হ'বলগীয়া হয় নৈপৰীয়া ৰাইজ।
ৰঙানদী জলবিদ্যুৎ প্ৰকল্পই এৰি দিয়া পানীত ঘৰ-ভেঁটি, সা-সম্পত্তি হেৰোৱাই নিথৰুৱা হয় বহু পৰিয়াল। কাণষাৰ নাই জাতি-মাটি-ভেটি সুৰক্ষাৰ কথা কোৱা বিজেপি চৰকাৰৰ। সেয়ে এই সমস্যা সমাধানৰ বাবে বিহিত ব্যৱস্থা গ্ৰহণ কৰিবলৈ সংগঠনটোৱে চৰকাৰক দাবী জনায়।
