দিল্লীঃ সোণালী ৰঙৰ ১০ টকীয়া মুদ্ৰাই দেশৰ জনসাধাৰণৰ পকেট শুৱনি কৰাৰ পাছত এইবাৰ ভূমুকি মাৰিব ২০ টকীয়া মুদ্ৰাই। অতি সোনকালেই ভাৰতীয় ৰিজাৰ্ভ বেংকে দেশত মুকলি কৰিব নতুন ২০ টকীয়া মুদ্ৰা। দেশৰ বিত্ত মন্ত্ৰালয়ে সদৰী কৰিছে এই তথ্য। বৰ্তমানলৈকে এই মুদ্ৰাৰ আকৃতি ৰাজহুৱা কৰা নাই যদিও ২০ টকীয়া মুদ্ৰাৰ ফটো ভাইৰেল হৈ পৰিছে।
প্ৰাপ্ত খবৰ অনুসৰি, আন মুদ্ৰাৰ দৰে এই ২০ টকীয়া মুদ্ৰাটোৰ আকৃতি গোলাকাৰ নহয়। পলিগন আকাৰত নিৰ্মাণ হ’বলগীয়া এই মুদ্ৰাটোৰ থাকিব ১২ টা কোণ। উল্লেখ্য যে, ইয়াৰ পূৰ্বে ২০০৯ চনৰ মাৰ্চ মাহত ভাৰতত মুকলি হৈছিল ১০ টকীয়া মুদ্ৰা। এই মুদ্ৰা বন্ধ হৈ যোৱা বুলি মানুহৰ মুখ বাগৰি হোৱা ভুৱা প্ৰচাৰত কিছুদিনৰ বাবে দেশৰ কিছু স্থানত প্ৰচলন হোৱা নাছিল এই মুদ্ৰাটো। কিন্তু ৰিজাৰ্ভ বেংকে ঘোষণা কৰিছে যে ৰিজাৰ্ভ বেংকৰ সকলো মুদ্ৰাই দেশত প্ৰচলন হ’ব লাগিব। শেহতীয়াকৈ আদালতেও এই সন্দৰ্ভত এক ৰায় প্ৰদান কৰিছে।
