উত্তৰ গুৱাহাটীত কৃত্রিম বান

গুৱাহাটী: বাৰিষা কাল উত্তৰ গুৱাহাটীৰ বহু পৰিয়ালৰ বাবে অভিশাপ। এজাক মাত্ৰ বৰষুণ দিলেই ৰহধলা, মধুপুৰ, কটাহবজাৰ, কলবাৰী, অভয়পুৰকে ধৰি কেইবাটাও অঞ্চলৰ বাট-পথ, ঘৰ ইত্যাদি কৃত্ৰিম বানত বুৰ যায়।

ফলত ৰাইজে হাৰাশাস্তি ভোগাৰ লগতে নানান অসুবিধাৰ সন্মুখীন হয়। যধেমধে উদ্যোগ স্থাপন আৰু ন ন আৱাসিক অঞ্চলসমূহ অপৰিকল্পিতভাৱে গঢ়ি উঠাৰ কাৰণে ঘোঁৰাজানকে ধৰি বিভিন্ন প্ৰাকৃতিক নলা নৰ্দমাবোৰৰ ওপৰত অবৈধ বেদখল হোৱাৰ পৰিণতিতে উত্তৰ গুৱাহাটীৰ ন ন অঞ্চলবোৰ কৃত্ৰিমবানৰ কবলত পৰিছে।

আজিৰ বৰষুণ জাকৰ পাছতে কলেজ নগৰত কৃত্ৰিম বানৰ পৰিস্থিতি উদ্ভৱ হৈছে। খবৰ অনুযায়ী আন বহু অঞ্চল কৃত্ৰিম বানৰ কবলত পৰিছে।