কলগাছিয়া: বৰপেটা জিলাৰ কলগাছিয়া আৰক্ষী থানাৰ অন্তৰ্গত কলগাছিয়া চৰকাৰী ডাক বাংলাত কাঠ চুৰি কৰা কেন্দ্ৰক লৈ চাঞ্চল্যৰ সৃষ্টি হৈছে। চতুৰ্থ বৰ্গৰ কৰ্মচাৰীৰ বিৰুদ্ধে সোচ্চাৰ হৈ পৰিছে স্থানীয় ৰাইজ। ৰাইজৰ তৎপৰতাত জব্দ কৰে ডাক বাংলাৰ কাঠসহ চাৰিখন ঠেলা।
আতোৱাৰ ৰহমান আৰু জাহেৰ আলি নামৰ দুই কৰ্মচাৰীয়ে নিজ গৃহলৈ নিব ওলাইছিল এই কাঠখিনি। চৰকাৰী ঘৰৰ কাঠভৰ্তি ঠেলাখন দেখি স্থানীয় লোকৰ সন্দেহ ওপজে আৰু লগে লগে স্থানীয় লোকে কাঠখিনি জব্দ কৰে। ঠেলাখনৰ চালকে জানিব দিয়া মতে নতুন গৃহ নিৰ্মাণৰ পিছত পুৰণি গৃহৰ সামগ্ৰীখিনি মজুত কৰি ৰখা আছিল। কিন্তু চতুৰ্থ বৰ্গৰ কৰ্মচাৰী দুজনে গোপনে এই সামগ্ৰীসমূহ হস্তগত কৰাৰ চেষ্টা কৰিছিল।
কিন্তু সাংবাদিক উপস্থিত হোৱাৰ পিছত সকলো গোপন অভিসন্ধি ধূলিসাৎ হয়। ঘটনাটো কলগাছিয়া আৰক্ষী থানাৰ ১০০ মিটাৰ নিলগত হয়। কিন্তু আতোৱাৰ ৰহমান আৰু জাহেৰ আলি ঘটনাস্থলীৰ পৰা পলায়ন কৰে।
