বজালীঃ বজালী মহকুমাৰ সদৰ পাঠশালাৰ সমীপৱৰ্তী ভােগপুৰৰ এগৰাকী উচ্চতৰ মাধ্যমিক চূড়ান্ত পৰীক্ষাত উত্তীৰ্ণ হােৱা ছাত্র নিৰুদ্দেশ হৈ আছে।
পাঠশালা আৰক্ষী চকীৰ অন্তৰ্গত ভােগপুৰ গাঁৱৰ অৱসৰপ্ৰাপ্ত শিক্ষক জগদীশ শর্মাৰ একমাত্র পুত্র চিন্ময় শর্মাই এইবাৰ কৃষ্ণকান্ত সন্দিকৈ জুনিয়ৰ কলেজৰ পৰা কলা শাখাত উচ্চতৰ মাধ্যমিক চূড়ান্ত পৰীক্ষাত অৱতীৰ্ণ হৈছিল।
পৰীক্ষা সমাপ্ত হােৱাৰ পিছৰে পৰা পাঠশালাত এটি কম্পিউটাৰ প্রশিক্ষণ কেন্দ্ৰত কম্পিউটাৰৰ শিক্ষাগ্রহণৰ কাৰণে আহিছিল। ছাত্রজনে আনদিনাৰ দৰে কালি পুৱা ৭:৩৫ বজাৰ ঘৰৰ পৰা কম্পিউটাৰ শিক্ষা গ্ৰহণৰ উদ্দেশ্যে পাঠশালালৈ ওলাই আহে।
যদিও সন্ধিয়া পর্যন্ত ঘৰলৈ উভতি নােযােৱাত আৰু ছাত্ৰজনৰ ম’বাইল ফোনটো বন্ধ হৈ থকাত পৰিয়ালৰ লােক চিন্তিত হৈ পৰে আৰু বিচাৰ খােচাৰ আৰম্ভ কৰে যদিও অদ্যাপি বিচাৰি নােপােৱাত পাঠশালা আৰক্ষী চকীত এখন এজাহাৰ দাখিল কৰে। বর্তমান আৰক্ষীয়ে তদন্ত অব্যাহত ৰাখিছে যদিও একো তথ্য উলিয়াবলৈ সক্ষম হােৱা নাই।
আনহাতে ছাত্র জনৰ সম্ভেদ পালে ওচৰৰ আৰক্ষী অথবা ৮৬৩৮৮-৮০৩৭২, ৯৯৫৭৮-২৪৮৫৫ আৰু ৮৬৩৮৫- ২৮৮১৮ নম্বৰত যােগাযােগ কৰিবলৈ পৰিয়ালৰ লােকে আহ্বান জনায়।
