লখিমপুৰঃ লখিমপুৰৰ নাৰায়ণপুৰত সংঘটিত হৈছে চাঞ্চল্যকৰ ঘটনা৷ স্বামীক শিৰচ্ছেদ কৰি কটা মূৰ লৈ থানা পালে পত্নী৷ এই চাঞ্চল্যকৰ ঘটনাটো লখিমপুৰৰ নাৰায়ণপুৰৰ কাঠনি মাজগাঁৱৰ৷ দীৰ্ঘদিন ধৰি ঘৰুৱা অশান্তিৰ পৰিণতিত পত্নীয়ে হত্যা কৰিলে স্বামীক৷
কাঠনি মাজগাঁৱৰ বুধিৰাম বৰকটকীয়ে প্ৰতিদিনে মদ্যপান কৰি ঘৰুৱা অশান্তি কৰি আহিছিল৷ যোৱা নিশা অনুৰূপ পৰিস্থিতি সৃষ্টি কৰি অশান্তি কৰি পত্নী গুনেশ্বৰী বৰকটকীক প্ৰহাৰ কৰাৰ পৰিণতিত পত্নীয়ে দাৰে ঘপিয়াই শিৰচ্ছেদ কৰে বুধিৰাম বৰকটকীক৷
পতিৰ কটা মূৰ মোনাত ভৰাই মাজৰাতি ধলপুৰ আৰক্ষী চকীত উপস্থিত হ’লহি পত্নী গুণেশ্বৰী বৰকটকী৷ নিশা প্ৰায় এঘাৰ বজাত সংঘটিত হোৱা হত্যাকাণ্ডৰ সময়ত ঘৰত নাছিল দুই পুত্ৰ৷ আৰক্ষীয়ে মাজনিশাই ঘটনাস্থলীৰ পৰা বুধিৰামৰ মুণ্ডহীন মৃতদেহ উদ্ধাৰ কৰে৷ পতি হত্যাকাৰী মহিলাগৰাকী সম্প্ৰতি বিহপুৰীয়া আৰক্ষীৰ জিম্মাত৷
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।